Hatutan.com, (04 Novembru 2022), Díli—Polísia Nasionál Timor-Leste (PNTL), unidade Servisu Investigasaun Kriminál Nasionál (SIKN), sei submete autór na’in 27 bá Primeiru Interrogatóriu iha Tribunál Distritál Díli (TDD) iha Sábadu 05 Novembru,  tanba involve konfrontu iha área Fatunaba, Suku Dare, Postu Administrativu Vera-Cruz, Munisípiu Díli.

Portavós komandu jerál PNTL, Superintendente Xefe Polisia, Arnaldo de Araújo.

Xefe Relasaun Internasionál no portavóz Komandu Jerál PNTL, Superintendente Xefe Polísia, Arnaldo de Aráujo informa, insidente ne’e akontese iha Kinta (03/11/2022), hale’u tuku 03:00 dadeer madrugada, Otl.

Lee Mós: Konfrontu iha Dare Durante Finadu, Ida Mate Fatin

Konfrontu ne’e rezulta vítima Clementino Borges (25) nia ulun-fatuk ho kondisaun kanek gráve, tanba hetan tuda ho fatuk hosi grupu juventude balun no mate fatin.

Hafoin akontesimentu, vitima nia familia sira tenta evakua duni vitima bá Hospitál Nacional Guido Valadáres (HNGV), Bidau Dili, atu bele hetan tratamentu saúde maibé, molok transporta to’o iha Bidau, vitima hakotu iss iha fatin akontesimentu.

Hosi akontesimentu ida ne’e, Komandu PNTL liuhosi Eskuadra Vera-Cruz hetan tán apoiu hosi Ekipa Sekreta Servisu Informasaun Polisia (SIP) nasionál nian, Unidade Espesiál FALINTIL, Servisu Nasional Intelijénsia, N2, S2, Makikit, no Batallaun Ordém Públika (BOP), to’o kedan iha fatin akontesimentu, halo vizilánsia durante madrugada ne’e to’o dadeer, konsege kaptura autór sira hamutuk na’in 27 mak deskonfia involve iha konfrontu ne’e.

Ekipa konjunta sira mós transporta kedan autór sira mai iha SIK Nasionál iha Kurtél Jerál PNTL Caicoli, hodi halo prosesu identifikasaun.

Oras ne’e dadaun, PNTL detein hela autór sira iha Sela Komandu Munisipiu Dili hodi kompleta oras 72 molok submete bá prosesu Primeiru Interrogatóriu judisiál iha TDD.

“Oras ne’e Polisia Nasional Servisu Investigasaun Kriminál halo tiha ona investigasaun bá sira na’in-27, inklui feto ida no sira ne’e detein hele iha sela detensaun PNTL Munisipiu Dili. Aban, Sábadu (05/11/2022), suspeitu ka autór sira ne’e sei lori bá halo primeiru interrogatóriu, hodi bele hatene aktu saida mak sira halo,” Portavóz Komandu Jerál PNTL, Superintendente Xefe Polisia, Arnaldo de Aráujo hateten liuhosi konferénsia imprénsa iha kuartél jerál PNTL, Caicoli, Sesta (04/11/2022).

Oras ne’e mós, Komandu PNTL destaka hela nia membru sira iha fatin akontesimentu, Fatunaba, Dare, hodi asegura no garante nafatin situasaun iha área ne’ebá, bele la’o iha hakmatek laran, nune’e fó espasu bá komunidade liu-liu inan-aman sira bele hala’o atividade di’ak no lívre.

“Agora daudauk situasaun iha fatin ne’ebá kontroladu. Prezensa ita-nia polisia sira iha ne’ebá, asegura ona fatin ida ne’ebá no komunidade sira mós moris hakmatek hela, sira bele halo nafatin sira-nia atividade. Ida ne’e mak situasaun enjerál. Ita hotu hatene katak, ita-nia povu hakarak moris hakmatek, povu hakarak halo nia atividades ho di’ak,” komandante Arnaldo hateten tán.

Komandu PNTL liuhosi portavóz, husu bá  komunidade sira tomak, liu-liu joven sira, atu hakmatek, labele influensia ho situasaun sira hanesan ne’e, tanba bele afeta bá inseguransa.

Kazu konfrontu ne’e, deskonfia involve hosi membru Grupu Arte Marsial (GAM), Persaudaraan Setia Hati Terate (PSHT) ho Grupu Arte Rituál (GAR), Sete-Sete (77).

Tanba ne’e, PNTL hakarak husu responsábilidade bá lider GAM ho GAR sira atu bele hakalma sira-nia ema, nune’e labele influensia fali hanesan ema seluk, atu bele mosu fali buat ne’ebé mak ema hotu la espera.

“Ho ida ne’e mak dala-ida tán PNTL  husu dala-da tán bá ita-nia lideransa sira ne’ebé kaer bá grupu sira ne’e, atu bele konvense sira-nia membru, nune’e labele influensia hosi ema seluk. PNTL ho F-FDTL prontu atu bele asegura ita-nia nasaun ne’e, bainhira nasaun ne’e presiza, atu bele halo hakmatek iha territóriu Timor-Leste tomak,” Arnaldo fó hanoin.

Jornalista: Rogério Pereira Cárceres