Hatutan.com, (18 Outubru 2022), Díli- Prezidente Repúblika (PR), José Ramos-Horta halao vizita estadu bá Kambodia, hahú hosi loron 19 to’o loron 21 fulan-Outubru 2022.

Prezidente Repúblika (PR), José Ramos-Horta. Foto/Elio dos Santos da Costa

Xefe Estadu Timor-Leste nia vizita ida-ne’e hodi hatán bá konvite hosi Liurai- Sua Majestade Preah Bat Samdech Preah Boromneath NORODOM SIHAMONI.

Vizita Estadu bá Reinu Kambodia ne’e nu’udár vizita daruak Xefe Estadu nian hafoin vizita bá dahuluk Prezidente Repúblika Ramos-Horta halao iha tinan 2011,  iha  mandatu prezidensiál tinan 2007-2012 .

Hosi ne’rbá kedas maka realiza ona interkambiu vizitas alto nivel lubuk ida no beibeik entre nasaun rua ne’e, inklui mós vizita ofisiál Kay Rala Xanana Gusmão, momentu ne’ebá uainhira kaer knaar Primeiru-Ministru iha tinan 2013 .

Iha tinan 2016,  vizita ofisiál S.E. Samdech Akka Moha Sena PadeiTecho Hun Sen, Primeiro-Ministro Reinu  Kambodia mai Timor. Hafoin iha tinan 2019, hatutan mós ho vizita traballu ba Kambodia  tantu hosi Prezidente Ramos-Horta nune’e mos hosi eis-Prezidente  Repúblika no eis-Primeiru-Ministru Kay Rala Xanana Gusmão.

“Kambodia no Timor-Leste iha no hala’o relasaun ne’ebé dia’k tebes  no nu’údar atuál Prezidente  ASEAN nian, Kambodia daudaun ne’e sai mos nu’udár defensor forte tebes kona-bá adezaun  Timor-Leste atu adere  bá membru ASEAN,”  sita komunikadu imprensa hosi Palásiu Prezidensiál.

Prezidente Repúblika, Ramos-Horta Hala’o Vizita Estadu Bá Kambodia, Tersa (18/10/2022). Foto/Elio dos Santos da Costa

Vizita ne’ebé atu halao dadaun ne’e sei sai nu’udár oportunidade di’ak hodi reforsa ka hametin liután parseria no amizade entre nasaun rua ne’e, no explora forma atu aumenta tan kooperasaun iha matéria  bá dezenvolve ekonomia, seguransa ai-han, konektividade aviasaun, troka kona-bá komérsiu nian, partilha esperiénsia iha setór mina-rai no mós kona-bá inisiativa regional sira entre matéria sira seluk tan.

Durante vizita Estadu ida-ne’e mós, Prezidente Ramos-Horta sei halao reuniaun  ho Sua Majestade Liurai, ho Primeiru-Ministru Hun Sen, no vizita kortezia ba Prezidente Senadu ba hosi Prezidente Assembleia Nasionál Reinu Kambodia nian.

Prezidente Repúblika José Ramos-Horta nia pontu kulminante maka sei bá ko’alia iha universidade tolu (3) ,tuir mai iha ne’ebá sei simu kondekorasaun iha “Doutoramento Honoris Causa iha Administração no Liderança Educativa” no ida fali iha “Professor Honorário Distinto de Relações Internacionais”.

Iha vizita Estadu ida ne’e mós akompaña hosi sekór privadu Timor Leste nian no komunidade emprezarial  no sira iha ne’ebá  sei partisipa iha Fórum Emprezariál ida ne’ebé maka organiza hosi Ministériu  Negósiu Estranjeiru  no Kooperasaun no Embaixada Timor-Leste iha Reinu Kambodia  ein parseria ka servisu hamutuk ho Câmara de Comércio Kambodia nian no ho Trade Invest Timor-Leste.

Prezidente Ramos-Horta sei fila fali mai Timor-Leste iha loron 23 fulan-Outubru 2022.

Jornalista: Vito Salvadór