Hatuta.com, (17 Outubru 2022), Díli- Komisaun Anti-Korrupsaun (CAC, sigla portugés) sie fundamenta análize bá objetu no dokumentu hotu ne’ebé rezulta hosi medida buska no apreensaun bá Ministru Asuntu Parlamentar no Komunikasaun Sosiál (MAPKOMS), Francisco  Martins da Costa Pereira Jerónimo  iha Palásiu Governu,  Federasaun Futebol Timor Leste (FFTL) ho nia rezidénsia iha Liquiça, Segunda (17/10/2022).

Lee Mós : Kazu Instalasaun Set-Top Box RTTL,E.P, CAC Halo Buska no Apreensaun iha Gabinete MAPKOMS, FFTL ho Rezidénsia Likisá

Komisáriu CAC Sérgio Hornai. Foto/Elio dos Santos da Costa

Komisáriu CAC  Sérgio Hornai hateten, hafoin halo apreensaun no identifikasaun ba Ministru MAPKOMS maka CAC sei hakle’an análise bá objetu no dokumentu sira molok halo submisaun ba Ministériu Públiku (MP).

Bá jornalista sira iha Edifísiu CAC, Komisáriu Sérgio Hornai hato’o parabéns komunikasaun sosiál ne’ebé maka fó atensaun bá iha kazu projetu  instalasaun Set-top Box Rádiu Televizaun Timor Leste, Empreza Públiku (RTTL,E.P).

Apreensaun no buska bá Ministru MASPKOMS, tuir Sergio Hornai, nu’udár kontinuasaun husi kazu buska, apreensaun no detensaun ne’ebé hala’o bá arguido na’in-rua ho inisiál G no M iha Kuarta (12/10/2022), bainhira Tribunál efetua mandadu detensaun, mandadu buska no revista inklui halo mós apreensaun no detensaun bá iha suspeitu na’in-rua; ida nu’udár Asesór iha Gabinete MAPKOMS no suspeita ida seluk nu’udár Sekretaria iha Gabinete Prezidente FFTL.

“Ohin nu’udár prosesu ida kontinuasaun hosi desizaun ne’ebé iha primeira interrogatóriu iha Domingu (16/10/2022) ne’ebé halo tiha ona ba iha suspeitu na’in-rua no ohin ita fó kontinuasaun bá marsa prosesu ida-ne’e nian tamba iha mandadu ne’ebé efetua hosi Tribunál Distritál Díli (TDD) liuhosi juiz primeiru interrogatóriu ne’ebé fó mandadu ida ne’e para atu halo buska no mós halo apreensaun  bá iha objetu balun ne’ebé iha relasionamentu bá iha kazu instalasaun Set-top Box RTTL, E.P nian,” Sérgio Hornai hateten.

Nia hatutan, relasiona ho estatutu MAPKOMS nian nafatin hanesan sidadaun baibain no nafatin asume nia kargu hanesan Ministru tamba CAC sei halo hela investigasaun konserteza se aban bainrua iha probabilidade rua de’it, se iha evidénsia entaun iha posibilidade bele sai suspeitu no se laiha nia tenke livre hanesan ema baibain no halao’ nia funsaun hanesan baibain, depende ba iha rezultadu investigasaun, depende bá iha dokumentu sira ne’ebé CAC rekolla, no halo análise atu tau lolós kada dokumentu ne’e iha ne’ebé.

Tuir kódigu prosesuál penal ninian iha artigu 53 hateten katak bainhira órgaun polisiál kriminál sira haree iha nesesáriu ruma mosu tamba espíritu artigu ida-ne’e nian bele halo identifikasaun no identifikasaun ne’e rasik bele halo iha fatin ruma ka mai iha sede ka eskuadra poliíia ninian exatamente iha CAC para atu halo identifikasaun pessoal hanesan Ministru Francisco Jerónimo   ne’ebé ohin halo tiha ona nia identifikasaun bá ida ne’e.

Lee Mós : Kazu Instalasaun Set-Top Box RTTL,E.P, TDD Aplika Medida Aprezentasaun Periódika no Proibisaun Auzénsia bá Arguidu Sira

Ministru MAPKOMS iha CAC. Foto/Elio dos Santos da Costa

“Ita boot sira se hatene didi’ak artigu 53, uainhira ita halo identifikasaun ita boot sira hatene ona, espíritu ida ne’e órgaun polisia kriminál, hanesan poder polísia nian hateten iha artigu 52 atu halo identifikasaun bá sidadaun se de’it mak ita suspeita, envolve iha kazu ruma ita presiza halo identifikasaun, no prosesu ne’e tenke lao kontinuasaun, liu husi halo análize bá dokumentu sira, bá prova hotu-hotu ne’ebé iha, se iha nesesáriu ita lori nafatin bá oin,” Nia subliña.

Prazu ba halo análise ba dokumentu sira lei la hateten kona-bá prazu maibé CAC rasik presiza halo averiguasaun ida, presiza halo análise ida kle’an bá dokumentu sira ne’e ikus mai CAC aprezenta hanesan relatóriu ikus hodi halo submisaun ba iha Ministériu Públiku.

Tuir observasaun Hatutan.com iha edifísiu CAC, Farol, Díli haree katak ekipa CAC ho Ministru MAPKOMS husi rezidénsia Ministru nian iha Liquiça too iha edifísiu CAC hale’u tuku 15:00 Otl liu minutu balun, bainhira to’o iha CAC, molok submete bá prosesu investigasaun, Ministru MAPKOMS hasoru uluk Komisáriu CAC ho adjuntu komisáriu  nai’n rua durante minutu 30 nia laran, hafoin Ministru sai husi Gabinete Komisáriu nian, diretamente bá kedan sala investigasaun CAC  nian.

Ministru MAPKOMS tama ba sala investigasaun CAC nian hale’u stuku 16:00 Otl no sai fali iha tuku 18:00 Otl.

Iha identifikasaun no investigasaun ne’ebé investigador CAC sira halo ne’e, Hatutan.com observa katak lao ho silénsiu no parte MAPKOMS mós kolabora hodi tuir prosesu hotu to’o nia rohan.

Bainhira jornalista sira konfirma ho Komisáriu CAC kona-bá enkontru ho ministru MAPKOMS molok submete ba investigasaun,  Komisáriu ne’e argumenta katak enkontru ne’e laiha relasionamentu ho investigasaun no identifikasaun ne’ebé CAC halo bá MAPKOMS tamba iha sorumutuk ne’e la’ós nia ho ministru mesak, maibé ho mós nia adjuntu na’in-rua molok sujeita bá iha investigasaun kriminál.

“Sidadaun hotu-hotu tenke merese atu hetan respeita bá ida ne’e,  no ida ne’e hanesa maneira ka jestu ida atu halo tratamentu ida no sesé de’it mak mai iha CAC. Ha’u sempre kumprimenta  sira no ida ne’e la influensia prosesu ida tamba prosesu ne’e lao independentemente, hala’o ho profisionál tuir de’it mak lei,” Sérgio Hornai hateten.

Jornalista: Vito Salvadór