Hatutan.com, (13 Outubru 2022), Díli—Vise Ministru Justisa (V-MJ), José Edmundo Caetano, “haruka duni” karta bá Primeiru-Ministru (PM), Taur Matan Ruak, Vise-Ministru Interior (V-MI), António Armindo ho Komandante  Jerál Polísia Nasionál Timor-Leste (PNTL), Komisáriu Faustino da Costa, husu atu ezonera Ajente Xefe Polísia Gastão Piedade.

Lee Mós : PM Taur Hein Rezultadu Investigasaun Bá Intervensaun V-MJ ho V-MI iha SNI

Karta Vise-Ministru Justisa, José Edmundo Caetano, hato’o bá PM, V-MI ho Komandante Jerál PNTL atu Ezonera Gastão da Piedade. Foto/Repro

Foto/Repro

Iha karta ne’ebé Hatutan.com asesu hatudu katak  karta Vise-Ministru Justisa, José Edmundo Caetano nian ne’ebé nia rasik asina no iha loron 06 fulan-Outubru 2022,  husu bá parte kompetente na’in tolu; Primeiru-Ministru, Vise-Ministru Interior ho Komandante Jerál PNTL, ne’ebé nu’udár superiór bá Diretór Nasionál Informasaun Interna Servisu Nasionál Intelijénsia (DNII-SNI), Ajente Xefe Polísia Gastão Piedade, atu bele ezonera  Gastão de Piedade ka haruka fila nia bá Komandu Jerál PNTL.

Karta ho númeru referénsia; 02/GV-MJ/X/2022 ne’e konsidera  komunikasaun ka diskusaun ne’ebé ikus mai video viral iha sosiál media (SosMed) Diretór Nasionál Informasaun Interna Servisu Nasionál Intelijénsia (DNII-SNI), Ajente Xefe Polísia Gastão Piedade, la hatudu étika profisionál  no la iha sentidu asegura segredu justisa.

Iha biban seluk, jornalista sira konfirma asuntu ne’e bá Primeiru-Ministru (PM) nu’udár mós Ministru Interior, Taur Matan Ruak, hateten, nia seidauk bele ko’alia buat ruma tanba nia rasik la iha koñesimentu no presiza iha investigasaun.    

Hafoin hasoru malu ho Prezidente Repúblika (PR), José Ramos-Horta, Kinta (13/10/2022), iha Palásiu Prezidensiál, Taur Matan Ruak,  hateten, nia hein rezultadu investigasaun kle’an relasiona intervensaun hosi membru Governu na’in-rua; Vise-Ministru Justisa (V-MJ), José Edmundo Caetano ho Vise-Ministru Interior (V-MI), António Armindo bá Servisu Nasionál Intelijénsia (SNI).  

Vise-MI, António Armindo ho Vise-MJ, José Edmundo Caetano, akompaña sira-nia Konselleiru Másimu partidu KHUNTO, José dos Santos “Naimori Bucar” bá iha edifísiu SNI hodi buka hatene osan fíziku ho montante $130.000 ne’ebé autoridade sira halo apreensaun iha Aeroportu Internasionál Prezidente Nicolau Lobato, iha loron 04 fulan-Outubru 2022.

Osan  $130,000 hosi partidu KHUNTO nian ne’e tenta atu lori sai bá  Indonézia atu halo kompras bá nesesidade partidu KHUNTO nian hodi prepara bá kampaña eleisaun jerál 2023.  

Lee Mós : Kazu Osan, RENETIL Lamenta Intervensaun Vise-Ministru José Edmundo ho Vise-Ministru António Armindo

Xefe Gabinete Vise-Ministru Interior Mós Haruka Karta

Karta Xefe Gabinete Vise-Ministru Interior. Foto/Repro

Hosi sorin seluk, iha loron 07 fulan-Outubru 2022, Xefe Gabinete Vise-Ministru Interiór mós hasai karta ida hosi hato’o bá Xefe Gabinete Ministru Interior, Horacio de Almeida, Xefe Gabinete Komandante Jerál PNTL, Inspetór Xefe Polísia, Horacio Assis  Barreto ho Xefe Gabinete Segundu Komandante Jerál PNTL, Inspetór Polísia Agapito Monteiro, kona-bá atu halo xamada atensaun forte bá Ajente Xefe Polísia Gastão Piedade.

Informasaun ne’ebé sirkula iha Komandu Jerál PNTL no sai ona segredu públiku katak, Vise-Ministru Interior, António Armindo fó presaun  liuhosi telefone bá Komandante Jerál PNTL, Komisáriu Faustino da Costa,  atu foti lalais desizaun ezonera Gastão Piedade.  

Vise-MI Rejeita Halo Presaun

Liuhosi messenger Facebook, Kuarta (12/10/2022), Vise-Ministru Interior, António Armindo  hateten, kona-bá informasaun ne’ebé espalla katak, deskonfia nia parte husu bá Komandu PNTL atu fó presaun bá Ajente Xefe Polísia Gastão Piedade, liu-liu demite hosi instituisaun seguransa ne’e, maibé nia parte rejeita, katak informasaun ne’e laloos.

“Hakarak hateten de’it katak, depois akontesimentu iha aeroportu ne’e, ha’u nu’udár Vise-Ministru Interior, seidauk halo karta ruma bá komandu jerál PNTL, tanba ha’u hatete katak, membru ne’e servisu ho SNI temporariamente, la’ós ho PNTL,” Vise-Ministru António Armindo hateten.

Komandu Jerál Polisia Nasionál Timor-Leste (PNTL) liuhosi Segundu Komandante Jerál, Komisáriu Mateus Fernandes, Kuarta (12/10/2022), bolu “urjente” Ajente Xefe Polísia Gastão Piedade, hodi hasoru malu iha kuartél jerál PNTL.

Informasaun ne’ebé Hatutan.com asesu katak, razaun komandu bolu “urjente” Ajente Xefe Gastão Piedade, tanba relasiona ho kazu apreensaun osan fíziku ho montante $130.000 ne’ebé prende hosi autoridade polisiál sira iha Aeroportu Internasionál Prezidente Nicolau Lobato, Tersa, 04 fulan-Outubru 2022.

La’ós ne’e de’it, parte komandu PNTL bolu “urjente” nia Ajente Xefe ne’e, tanba deskonfia Vise-Ministru Interior (MI), António Armindo, husu bá komandu PNTL atu halo fó presaun bá Xefe Investigadór Servisu Nasionál Intelijénsia (SNI) ne’e  tanba ho lian-maka’as ko’alia hasoru membru Governu na’in-rua (2) hosi KHUNTO, bainhira sira bá husu SNI atu fó fila osan ne’ebé autoridade polisiál sira prende.

To’o notísia ne’e publika seidauk iha konfirmasaun ho Vise-Ministru Justisa (V-MJ), José Edmundo Caetano.

Jornalista : Rogério Cárceres