Hatutan.com, (10 Agostu 2022), Díli— Sekretáriu Estadu Terras no Propriedade (SETP) hamutuk ho Polísia Nasionál Timor Leste (PNTL), apoiu hosi guarda Munisípiu Díli liu hosi depaixu despezu administrative, halo despezu administrativu ka hamamuk rai Estadu ne’ebé lokaliza iha Bebonuk, antes ne’e okupa hosi Acacio da Costa Guterres, Kuarta (10/08/2022).

Polisia ho autoridade sira hasai okupante Rai Estadu iha Bebonuk, Kuarta (10/08/2022). Foto/Hatutan.com.

Maski okupante Acacio da Costa Guterres laiha fatin, maibé ekipa hasai diretamente sasan uma laran okupante sira nian hanesan armari, kama, kadeira, meza, inklui sasan sira seluk no husu família okupante atu sai hosi uma, tanba konsidera rai ne’e partense ba Estadu.

Lee Mós: Arte Moris Sei Lori SETP ba Tribunál

Iha despezu ne’e deskonfia hetan despaixu hosi superiór ne’ebé servisu iha Ministériu Justisa (MJ) inklui notifikasaun hosi Tribunál Distritál Díli (TDD).

Família okupante Angelina Pinto haktuir katak, nia oan mane Acacio da Costa Guterres sosa tutan rai ne’e hosi Isaac Pinto iha tinan 2008, maibé iha despezu administrativu ne’e seidauk iha notifikasaun ba okupante sira.

“Sira la fó notifikasaun ruma ba ami, tanba bainhira ami tama iha tinan 2008 depois de ha’u nia oan mane Acacio da Costa Guterres sosa rai ne’e hosi Isaac Pinto, nia konsege halo uma ne’e maibé derrepenti de’it ami la hatene buat ida dehan fali rai ne’e Estadu nian no atu fó fali ba Jape aluga,” Angelina Pinto ba Hatutan.com iha ninia hela fatin Bebonuk bainhira ekipa ba halo despezu administrativu.

Tuir koñesimentu autoridade lokál Bebonuk nian, katak antes ekipa halo despezu administrativa nia parte simu notifikasaun hosi Tribunál no entrega ba okupante Acacio da Costa Guterres, katak antes de loron 30 husu atu okupante tenki hamamuk fatin refere.

“Antes notifikasaun kona-bá despezu administrativu ne’e no ami mós hato’o ba Acasio ho nia familia no iha momentu ne’ebá sira mai iha sede suku hodi hateten katak sira sei ba hasoru advogadu hodi halo rekursu ba sira nia direitu hanesan sidadaun Timor,” Xefe suku Bebobuk Serafin Masedo hateten.

Estatutu rai ne’e hanesan eransa Indonézia nian ho nune’e bainhira ukun an Estadu mak administra, maibé iha tinan 1999 okupante primeiru sidadaun Timor Isaac Pinto mak hela iha rai-ne’e.

Iha tinan 2008 Acacio da Costa Guterres haree fatin ne’e seguru tanba ne’e nia parte fó kompensasaun ka osan transporte nian ba Isaac Pinto hodi entrega rai ne’e ba nia ho familia hodi halo uma no hela to’o agora, maske iha momentu ne’eba autoridade lokál sira asina maibé konsidera hanesan rai Estadu nian tanba eransa Indonézia.

Relasiona ho despezu ne’e, jornalista Hatutan.com halo konfirmasaun ho Diretór Jerál Terras no Propriedade via telefónika, maibé nia rezeita atu fó komentáriu ho razaun katak kompeténsia Ministru Justisa (MJ) nian.

Jornalista: Carmelita Isaac