Hatutan.com, (20 Jullu 2022), Díli—Governu liuhosi sorumutu Konsellu Ministru (KM) ordináriu, iha Kuarta 20 jullu 2022 aprova projetu dekretu-lei hodi hapara importasaun karreta “sukata” sira hosi estranjeiru mai Timor-Leste (TL).

Reuniaun KM. Foto/media KM.

Projetu dekretu-lei ne’e, aprezenta hosi Ministru Finansas (MF), Rui Augosto Gomes, ba alterasaun dahuluk Dekretu Lei númeru 30/2022, loron 27 fulan-jullu, kona-bá kondisaun no prosedimentu sira atu observa kona-bá importasaun veíkulu motorizada sira.

Lee Mós: Presiza Lei Espesífiku Atu Regulariza Importasaun Karreta “Sukata”

Ministru Prezidénsia Konsellu Ministru (MPKM), Fidelis Manuel Leite Magalhães esplika, objetivu hosi aprovasaun ba projetu Dekretu-lei ne’e atu hapara importasaun karreta sira ne’ebé xoke tiha iha nasaun liur, depois lori fali mai Timor-Leste.

“La’ós karreta de’it, motór mós. Ezemplu sira xoke tiha iha nasaun seluk, motór xoke rahun hotu depois lori mai Timor. Nune’e mós karreta, xoke rahun tiha, dezastre tiha, iha ne’ebá la hadi’a, lori fali mai iha Timor, depois iha Tmor mak halo fali montajen tun-sa’e, hodi tahan fila-fali. Ida-ne’e, ita la permite,” Ministru Prezidénsia Konsellu Ministru (MPKM), Fidelis Manuel Leite Magalhães, hateten liuhosi konferénsia imprensa iha Palásiu Governu, Díli.

Liuhosi Dekrtu-Lei ida-ne’e, espera sei kontribui hodi solusiona problema ne’ebé mak durante ema hotu akompaña kona-bá karreta sira ne’ebé mak estragadu, ne’ebé mak durante ne’e tama mai rai-laran.

“Iha ne’ebá mós iha multa. Ne’ebé, sé mak kontribui hodi halo tentativa atu hatama motór ka karreta sira xoke tiha, sira sei hetan multa hahú hosi $1.000 to’o $30.000. Mais ne’e ba kada aktu. Ne’ebé sé tentantiva ne’e dala-10, vezes de’it 30.000,” Fidelis Magalhães hateten.

Liu ona tinan sanulu kona-bá aprovasaun diploma ida-ne’e, hatudu duni nesesidade atu introdús kondisaun sira ne’ebé ezijente liu ba importasaun veíkulu no kontrola efikás liu ba operasaun importasaun nian, atu asegura protesaun konsumidór no meiu ambiente.

Ba efeitu ida-ne’e, projetu Dekretu-Lei daudaun ne’e, hakarak akresenta bandu importasaun motorizada no veíkulu lijeira ba pasajeiru sira no mistu (kareta ne’ebé tula pasajeiru no sasán merkadoria nian), ne’ebé la kumpri kondisaun téknika sira sirkulasaun iha territóriu nasionál no kria rejíme kontra ordenasionál ida hodi kastigu sira ne’ebé la kumpri regra iha diploma ida ne’e.

Ho aprovasaun projetu Dekretu-Lei ida-ne’e, hakarak mós simplifika prosedimentu importasaun veíkulu sira ho eliminasaun autorizasaun prévia no konsentra ba verifikasaun rekézitu legál sira importasaun nian iha momentu ida de’it, nune’e fasilita importasaun sira tuir lei.

Jornalista: Rogério Pereira Cárceres