Hatutan.com, (07 Jullu 2022), Díli- Primeiru-Ministru (PM), Taur Matan Ruak, informa Governu liu husi Sekretáriu Estadu Protesaun Sivíl (SEPS), iha hela terenu hodi halibur dadus,  populasaun sira ne’ebé afeita husi inundasaun iha Munisípiu Lautem, Covalima, Viqueque ho Manufahi.

Lee Mós : SEPS Rejista Tan Vítima Dezastre Naturál 200

Primeiru Ministru (PM) Taur Matan Ruak. Foto/Hatutan.com

PM Taur Matan Ruak hateten, iha nia  hasoru  malu Prezidente Repúblika ko’alia mós asuntu importante kona-bá dezastre naturál ne’ebé akontese iha Lospalos, Viqueque, Same no Suai ne’ebé afeta populasaun besik 700 to’o 900.

SEPS ho Autoridade Protesaun Sivíl (APS) sei kontinua halo levantamentu  dadus hodi haree dalan saida mak Governu bele apoiu vítima inundasaun sira.

“Dadus provizóriu bá vitima inundasaun iha 700 ka 900 no família uma-kain 30-resin mak daudaun ne’e evakua, maibé ne’e provizóriu de’it no ita seidauk iha dadus finál Sekretáriu Estadu Protesaun Sivil (SEPS) no elementu sira servisu diresaun apoiu dezastre naturál bá halo hela levantamentu atu haree loloos dadus populasaun hira mak afeitadu depois Governu bele mobiliza rekursu hodi apoiu sira,” Taur Matan Ruak hateten bá jornalista sira iha Palásiu Prezidensiál, Kinta (07/072022).

Governu atu apoia vítima inundasaun ida mak apoiu família sira no ida seluk mak apoiu bá iha reparasaun bá estragu fíziku sira.

Iha sorumutu ne’e sefe estadu no Xefe Governu iha mos konkordánsia bá atividade Governu nian ne’ebé hola parte mós ba inisiativa Xefe Estadu nian ne’ebé iha loron 09 fulan-Jullu ne’e, sei bá halo diálogu ho komunidade iha Ermera kona-ba kafé.

“Há’u promete ba Xefe Estadu atu partisipa iha inisiativa ida ne’e ho ministru sira balun, atu ko’alia ho komunidade no rona komunidade sira nia preokupasaun,” Taur Matan Ruak hateten.

Jornalista: Vito Salvadór