Hatutan.com, (30 Juñu 2022), Díli-Peskiza ne’ebé halo husi Asosiasaun Defisiente Timor Leste (ADTL)  deskobre ema ho defisiente kontinua enfrenta dezafiu iha área edukasaun, liu-liu eskola seidauk intende nesesidade ema ho defisiente, tanba ne’e susar tebes ema ho defisiente atu asesu ba edukasaun.

Lee Mós : Estadu Presiza Aselera Ratifikasaun Konvensaun Internasionál Direitu Bá Ema ho Defisiénsia

Lansamentu estudu no peskiza tinan 20222 ne’ebá realiza husi USAID no NGO nasionál ualu iha Hotel Timor, Díli, Kinta (30/06/2022). Foto/Hatutan.com

“Bareira primeiru ne’ebé satan netik ema ho defisiente hodi asesu bá edukasaun maka distánsia eskola ne’ebé dook, kapasidade finanseira família, atitude ema nian, eskola seidauk intende nesesidade ema ho defisiente tanba eskola balun seidauk bele simu,” diretór ADTL, Cesario da Silva, hateten bainhira aprezenta rezultadu peskiza iha lansamentu  peskiza tinan 20222 ne’ebé realiza husi USAID no NGO nasionál ualu iha Hotel Timor,  Díli, Kinta (30/06/2022).

Deskobrimentu seluk maka, estudante defisiente rekorrente hakarak kontinua Estudu maibé iha kontestu TL klase rekorrente foin iha nivel báziku no ensinu sekundáriu seidauk iha. Tanba ne’e, ADTL husu ba Ministériu Edukasaun Juventude no Desportu (MEJD) liu-liu iha alokasaun OJE atu asegura implementasaun polítika edukasaun inkluzivu.

Hatán bá difikuldade ne’ebé ema ho defisiente hasoru, xefe edukasaun inkluzivu Ministériu Edukasaun Juventude no Desportu (MEJD), José Monteiro, promete katak rekomendasaun ne’ebé iha sei kompleta servisu MEJD hodi hatán bá dezafiu ema ho defisiente.

“Durante ne’e Governu fó oportunidade ba ema ho defisiénsia bele eskola iha ne’ebé de’it no hamutuk kualkér kolega ne’ebé ita hanaran inkluzivu ho fasilidade ne’ebé apoia husi inan-aman, tanba ne’e, ami iha ona planu ona atu kria kondisaun di’ak bá ema ho defisiente tantu iha eskola ne’ebé atu reabilita ka eskola foun sira tenke iha asesibilidade atu ema ho defisiente bele asesu ho avontade inklui fasilidade ne’ebé iha,” José Monteiro hateten.

MEJD mós iha ona planu hodi fó formasaun regular bá professor jestuariu sira ne’ebe hetan ona aprovasaun iha konsellu ministru, tanba daudaun ne’e iha de’it professor  jestuariu hamutuk 100.

Tuir dadus MEJD katak iha estudante defisiente hamutuk 4.454 maka hetan ona asesu bá eskola públiku.

Peskiza refere hetan apoiu husi USAID ne’ebé servisu hamutuk ho ONG Nasionál ualu hanesan Asosiasaun Defisiénsia Timor-Leste (ADTL), Belun, Community Based Rehabilitation Network Timor-Leste (CBRNTL), Fundação Hafoun Timor-Leste (FHTL), Programa Monitorizasaun ba Sistema Judisiáriu (ISMP), Many Hands One Nation (MAHON), Mata Dalan Institute (MDI), Programa Espesífiku fó Prioridade ba Ema Kiak (PROSPEK) ne’ebé kobre aspetu asesu bá edukasaun no saúde bá ema ho defisiénsia, mekanizmu rezolusaun disputa profisionál bá joven iha área rurál, monitorizasaun komunitária bá projetu asesu bá bee, protesaun labarik sira husi violénsia seksuál, asesu ba formasaun professional bá joven iha area rural, monitorizasaun komunitáriu bá projetu infrastrutura lokál no asesu ba merkadu ba produtór agríkola rurál.

Jornalista : Carmelita Isaac