Hatutan.com, (09 Juñu 2022), Díli—Primeiru Ministru (PM) Taur Matan Ruak simu ona karta lamentasaun hosi International Federation for Journalist (IFJ), relasiona ho Keixa “Denuncia Caluniosa” hosi Ministru Assuntu Parlamentár no Komunikasaun Sosiál (MAPKOMS) Francisco Martins da Costa Perreira Jerónimo hasoru Jornalista, Editór no Xefe Redasaun Hatutan.com, Francisco Belo Simões da Costa.

Primeiru Ministru (PM), Taur Matan Ruak.

“Ha’u simu ona karta husi IFJ. Hosi ha’u-nia parte rejista preokupasaun sira-ne’e. Só ke, ne’e hanesan ita boot sira hatene komu nia prosesu la’o ona, ne’e ita tuir tramitos normais ona,” Taur Matan Ruak hateten iha Palásiu Prezidensiál Nicolau Lobato, Bairru-Pité, Kinta (09/06/2022).

Lee Mós: MAPKOMS Halo Keixa “Denúncia caluniosa” Hasoru Xefe Redasaun Hatutan.com

Maski simu ona karta lamentasaun hosi IFJ, maibé Xefe Governu ne’e husu husu atu hotu-hotu la’o tuir norma ne’ebé iha perante perosesu ne’ebé la’o ona.

Iha Segunda 23 Maiu 2022, Jornalista nu’udár mós Xefe Redasaun Hatutan.com, Francisco Belo Simões da Costa, presta ona deklarasaun iha Ministériu Públiku (MP) ka Prokuradoria Distritál Díli, kona-bá keixa balun ne’ebé hatama hosi Francisco Martins da Costa Pereira Jerónimo, atuál Ministru Asuntu Parlamentár no Komunikasaun Sosiál (MAPKOMS).

Primeiru Ministru (PM) Taur Matan Ruak.

Iha Kinta (26/05/2022) Primeiru Ministru (PM), Taur Matan Ruak, lamenta tebes no la konkorda ho membru VIII Governu Konstitusionál, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé halo keixa “Denúncia Caluniosa” ba Ministériu Públiku (MP) hasoru jornalista no Xefe Redasaun Hatutan.com Francisco Belo Simões da Costa.

Antes ne’e mós Assosiasaun Jornalista, Timor-Leste Press Union (TLPU) husu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo atu rejigna-an hosi kargu nu’udár Ministru, tanba laiha sensibilidade no responsabilidade morál ba Liberdade Imprensa iha Timor-Leste.

Organizasaun sosiedade sivíl sira liu hosi Asian Justice And Rights (AJAR) ho Lalenok ba Ema Hotu (LABEH) antes ne’e konsidera Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo la hatudu ninia kualidade lideransa ne’ebé di’ak, no komete abuzu podér tanba halo keixa “Denuncia Caluniosa” hasoru jornalista no média online Hatutan.com ba Ministériu Públiku (MP) ka Prokuradoria Jerál Repúblika.

Iha 30 Maiu 2022, Ministru Assuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo deklara katak, “Denúncia Caluniosa”, la ameasa Liberdade imprensa iha Timor-Leste (TL).

Tanba ne’e Ministru ne’e mantein keixa hasoru jornalista, editór no Xefe Redasaun Hatutan.com bazeia ba kódigu penál 285 no husu atu husik orgaun idaidak hala’o ninia servisu.

Nune’e iha 02 Juñu 2022, Asosiasaun Jornalista Timor Leste (AJTL) deklara sei halo asaun pasífika hasoru Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, bainhira la retira ka dada hikas keisa “Denuncia Caluniosa” kontra Xefe Redasaun Hatutan.com, Francisco Belo Simões da Costa.

Lee Mós: “Denúncia Caluniosa” Hasoru Jornalista Hatutan.com Hanesan Notísia Triste ba Liberdade Imprensa TL

IFJ Husu Retira Keixa “Denuncia Caluniosa”, MAPKOMS Dehan Husik Órgaun Ida-idak Hala’o Nia Servisu

PM Taur Lamenta MAPKOMS Keixa Jornalista Hatutan.com ba Ministériu Públiku

Jornalista: Vito Salvadór