Hatutan.com, (06 Juñu 2022), Dili—Polísia Nasionál Timor-Leste (PNTL), liuhosi Unidade Patrullamentu Fronteira (UPF), Kompañia ALFA Postu Seguransa Memo, iha Segunda 06 Juñu 2022 maizumenus tuku lima oras dadeersan halo apreensaun ba manu Bangkok hamutuk 12, ai-kameli karon ida no kilat-manu 17, iha fronteira Bobonaro, entre Timor-Leste ho Repúblika Indonézia (RI).

Unidade Patrullamentu Fronteira (UPF), Kompañia ALFA Postu Seguransa Memo, halo apreensaun ba manu Bangkok hamutuk 12, ai-kameli karon ida no kilat-manu 17, iha fronteira Bobonaro, entre Timor-Leste ho Repúblika Indonézia (RI), iha Segunda (06/06/2022). Foto/PNTL.

“Ohin dadeer 06 Juñu tuku lima dadeersan, patrullamentu UPF nian iha Postu Memo, halo apreensaun ba manu ilegál Bangkok 12 ai-kameli karonn ida no kilat-manu hamutuk 17. Embora ida-ne’e mós iha boraxa kilat-manu plástiku tolu. Na’in ba sasán hirak-ne’e deskoñesidu,” Komandante UPF, Superintendente Polísia Euclides Belo, hateten ba jornalista sira iha Suai Room, Timor Plaza, Segunda (06/06/2022).

Lee Mós: UPF Presiza-tán Membru Atu Reforsa Seguransa Iha Fronteira

Evidénsia sira hanesan ai-kameli ho kuantidade hamutuk karon ida-ne’e, PNTL ninia deskonfia katak atu haruka ba rai-sorin, Atambua Indonézia.

Enkuandu, manu ho naran Bangkok hamutuk 12 ho kilat-manu 17 ne’e, ema halo transaksaun hosi Atambua-Indonézia mai TL.

“Tanba ne’e mak ita nia patrullamentu sira prende no kilat-manu ho manu Bangkok ne’ebé mak ohin ha’u temi ne’e, atu haruka mai Timor-Leste, hosi sorin mak halo transaksaun. Maibé, sidadaun ne’ebé halo transaksaun sira dezvia tiha hosi fatin no daudaun ne’e PNTL konsidera na’in ba objetu hirak ne’e, sei deskoñesidu,” Komandante Euclides esplika.

Evidénsia sira ne’ebé UPF prende oras-ne’e, membru sira transporta ona hosi Postu UPF Memo mai iha Kuartél Kompañia UPF Nuu-badak, Atabae hodi halo prosesu kontinuasaun no relata mós relatóriu ba ierarkia komandu jerál PNTL nian. 

Persentánjen ba Komérsiu Ilegál Hahú Menus

Unidade Patrullamentu Fronteira (UPF), Kompañia ALFA Postu Seguransa Memo, halo apreensaun ba manu Bangkok hamutuk 12, ai-kameli karon ida no kilat-manu 17, iha fronteira Bobonaro, entre Timor-Leste ho Repúblika Indonézia (RI), iha Segunda (06/06/2022). Foto/PNTL.

Komandante UPF Euclides Belo informa, durante iha tempu hirak ikus-ne’e, persentájen ba ema halo komérsiu ilegál iha liña fronteitra hahú menus.

Maibé, dadaun ne’e parte UPF sei halo hela mós ninia estatístika rasik hodi konklui rezultadu hosi númeru ka persentájen ida ne’ebé loos.

“Mais dadauk ne’e, pontu de vista hanesan komandante unidade nian, menus. Tanba ita nia sidadaun sira iha liña fronteira komesa iha ona konsiénsia,” Euclides Belo hateten.

Persentájen ema halo transaksaun ilegál iha fronteira Terrestre menus, tanba durante ne’e UPF sempre servisu hamutuk ho autoridade lokál hodi sensibiliza informasaun ba komunidade sira katak, bainhira atu sosa produtu ruma ka importa no esporta sasán ruma, tenke liuhosi dalan ne’ebé legal mak portaun boot Salele Suai, Mota-masin Bobonaro, Sakato no Oesílo RAEOA.

“Portaun hirak ne’e mak legál atu ita bele halo prosesu ekonomia la’o tuir dalan ne’ebé mak legál. Kuandu tuir dalan ilegál, laiha baze legál ba objetu hirak ne’e, PNTL suspeita hanesan sasán ne’ebé mak ilegál,” Euclides hateten.

Jornalista: Rogério Pereira Cárceres