Hatutan.com, (30 Maiu 2022), Díli- Prezidente Repúblika (PR), José Manuel Ramos-Horta, kondekora medalla méritu bá atleta no treinadór sira ne’ebé oferese medalla bá Timor-Leste iha eventu SEA GAMES bá dala-XXXI iha Vietnam, foin lalais ne’e.

PR Ramos-Horta Kondekora atleta ho treinadór sira ho medalla méritu. Foto/Hatutan.com

Medalla méritu Prezidénsia Repúblika ne’e kria liu husi dekretu númeru 15/2009, loron 18 fulan-Marsu, hodi rekoñese no agradese sidadaun sira militár, polísia, sivíl nasionál no internasionál ne’ebé servi nasaun Timor no pro bá orden sosiál no kauza asaun sira ho modu signifikativu bá pás no estabilidade nasionál.

Bazeia ba artigu 85 Konstituisaun RDTL alinea J, konjuga ho númeru 5 husi artigu 2 dekretu lei númeru 15/2009, PR kondekora atleta hirak tuir mai ne’e ho medalla méritu hanesan Atleta Delio Anzaqeci  Mouzinho husi modalidade Boxing ne’ebé oferese medalla osan mutin, José B. Q. da Silva husi modalidade Boxing ne’ebé oferese medalla osan metan, Felisberto de Deus husi modalidade Atletizmu ne’ebé oferese medalla osan mutin rua, Santina A. De S. Fernandes husi modalidade Taekwondo ne’ebé oferese medalla osan metan.

 PR  José Ramos-Horta mós kondekora mós treinadór na’in-tolu husi modalidade Boxing, Gil dos Santos Isaac, modalidade atletizmu Odete Belo no Taekwondo ho nasionalidade Korea Ki Tae Kim.

Iha diskursu PR José Ramos-Horta hateten, liu husi atividade desportiva, kultural no literária kontribui ba hametin dame  iha rai ida nia laran. Iha nasaun barak mak Governu sempre buka lori desportu para halo atividade ne’ebé kontribui bá orgullu nasionál no dame iha rai nia laran.

“Ita-boot sira la’ós de’it atleta, maibé embaixadór boa vontade bá nasaun nian,” José Ramos-Horta hateten.

PR Ramos-Horta foto hamutuk ho atleta no treinadór sira. Foto/Hatutan.com

Horta komprometidu atu kontinua ko’alia ho federasaun sira para oinsá ajuda no apoiu federasaun sira aumenta atividade desportiva sira iha eskola sira no lori desportu ba too iha suku no aldeia sira.

Vise-Prezidente Komisaun Olímpiku Nasionál Timor Leste (CEONTL), Mateus da Cruz hateten, ida-ne’e hanesan primeira vez atleta no treinadór sira simu kondekorasaun husi PR.  Ida-ne’e hanesan orgullu boot ba ajente desportista sira hotu no la’ós bá CONTL mesak maibé pratikante desportu sira hotu.

“Rekoñesimentu ida-ne’e hanesan orgullu boot bá delegasaun Timor-Leste ne’ebé bá partisipa SEA GAMES Vietnam,” Mateus da Cruz hateten.

Vise-prezidente CONTL ne’e hatutan ho atribuisaun medalla méritu ne’e motiva liután atleta sira no federasaun hotu atu book an no halo esforsu hodi bele hatudu prestasaun iha kompetisaun nasionál hodi bele reprezenta Timor-Leste iha jogu internasionál sira.

Atleta Atletizmu Felisberto de Deus hateten, hanesan timoroan  orgullu tamba bele reprezenta Timor-Leste iha jogu Sea Games no konsege konkista medalla osan mutin rua.

“Agradese bá Prezidente Repúblika ne’ebé fó ona kondekorasaun mai ami no ami iha esperansa katak ho avô Ramos nia ukun iha tinan lima ne’e bele tau kondisaun di’ak liután mai ami,” Felisberto de Deus hateten.

Atleta Taekwondo Santina A. De S. Fernandes, agradese bá treinadór, família no federasaun inklui povu Timor-Leste ne’ebé apoiu nia iha jogu Sea Games Vietnam.

Nia hateten, londekorasaun ne’ebé PR atribui sira hanesan motivasaun ida atu sira nafatin halo esforsu hodi hamorin Timor-Leste nia naran iha jogu internasionál.

Jornalista: Vito Salvador