Hatutan.com, (04 Maiu 2022), Díli— Índise Liberdade imprensa globál ne’ebé publika hosi Reportagen sem Fronteira ka Reporters Without Borders (RSF), Timor-Leste iha aumentu duplu, ka sa’e makás hosi 71 iha tinan 2021, ba 17 iha tinan 2022.

Jornalista Timor-Leste. Foto/Hatutan.com.

Aumentu ne’e hatudu katak, Timor-Leste ninia Liberdade imprensa di’ak liu iha Sudeste Aizátiku iha tinan 2022.

Valór Liberdade imprensa ne’ebé Timor Leste iha, hosi 70.89 iha 2021 ba 81.89 iha tinan 2022.

Lee Mós: Média Tenke Hadi’a Kualidade Hasoru Mundu Dijitál

Enkuantu, Timor Leste hanesan nasaun ne’ebé ho valor Liberdade imprensa di’ak liu iha Sudeste Aziátiku tinan ne’e tanba laiha jornalista ida ne’ebé kondenadu ho ninia produtu iha nasaun demokrátiku joven ne’e.

Alende ne’e iha ninia enkuadramentu jurídiku, iha artigu 40 no 41 Konstituisaun Repúblika Demokratika Timor Leste, proteje Liberdade imprensa no Liberdade espresaun.

Maski iha Kódigu prosesu penál 2009 bele halo denunsia kalunioza, maibé Konsellu Imprensa ne’ebé estabelesidu iha tinan 2015 ho objetivu atu fasilita hodi rezolve.

Formasaun ba jornalista Timoroan sira ne’ebé atu hetan karteira profisional Iha Conselho Imprensa (CI). Foto/CI.

Jornalista sira ho livremente hakerek notísia no ladún akontese violénsia fízika hasoru jornalista, maski sei enfrenta presaun ne’ebé limita sira nia Liberdade ne’e hosi polítiku sira.

RSF konta índise Liberdade imprensa ne’e liu hosi hato’o pergunta pertinente sira ba espesialista boot sira iha nasaun hamutuk 180.

Índise ne’e formadu bazeia ba indokadór boot hamutuk neen ne’ebé  reprezenta performa nasaun sira iha sira ninia pluralizmu, independénsia média, no salvasaun inklui liberdade jornalista sira.

Valór indíse ho nia formatu hahú hosi 0-100 ida ne’ebé mak ninia valór boot liu, ida ne’e mak ninia nível liberdade imprensa pior liu.

Nasaun 10 ne’ebé ho nia valór Liberdade imprensa piór liu iha mundu inklui Myanmar (176), iha ne’ebé kudeta Fevereiru 2021 halo Liberdade imprensa hakiduk tinan 10, Xina, Turkmenistan (177), Iran (178), Eritrea (179) no Korea do Norte (ba dala-180).

Komisaun ba peskiza kona-bá Liberdade imprensa ne’e iha ninia espesialista hamutuk na’in hitu. Mai hosi seitór akadémiku no média, RSF dezenvolve metodolojia ne’e atu bele forma índise Liberdade imprensa mundiál ba dala-20.

Jornalista: Elio do Santos da Costa