Hatutan.com (27 Abríl 2022) Díli— Konsellu Ministru (KM) aprova ona projetu Dekretu-Lei ida no projetu Dekretu Governu rua, iha ámbitu hosi Lei enkuadramentu ba Orsamentu Jerál Estadu (OJE) no ba jestaun finanseira públika nian, ne’ebé aprezenta hosi Ministru Finansa (MF), Rui Augusto Gomes.

“Diploma sira ne’ebé hetan aprovasaun maka: Projetu Dekretu-Lei nian ne’ebé ninia objetivu maka halo regulasaun ba Kompeténsia atu autoriza realizasaun despeza nian hosi serbisu no entidade sira Setór Públiku Administrativu nian,” Hatutan.com sita komunikadu, iha Kuarta (27/04/2022).

Lee Mós: KM Halo Alterasaun Dahuluk ba Lei OJE 2022

Ho diploma ida-ne’e, bainhira despeza iha valór dollar amerikanu millaun 10 ba leten, Konsellu Ministru maka iha kompeténsia atu fó autorizasaun ba realizasaun despeza.

Bainhira despeza sira hanesan ka menus hosi dolar amerikanu millaun 10, órgaun diresaun serbisu no entidade sira Setór Públiku Administrativu nian ho autonomia finanseira alargada mak iha kompeténsia atu fó autorizasaun ba realizasaun despeza.

Órgaun sira diresaun sira Prezidénsia Repúblika, Parlamentu Nasionál no Munisípiu nian sira iha kompeténsia atu autoriza realizasaun despeza, la haree ba ninia valór.

Iha Rejiaun Administrativa Espesiál Oe-Kusse Ambenu nian, ninia órgaun deliberativu rasik  mak iha kompeténsia atu fó autorizasaun ba despeza ho valór dolar amerikanu millaun 10 ba leten.

Projetu Dekretu Governu nian ne’ebé halo regulamentasaun ba estrutura kasifikadór orsamentál nian sira.

Espesifikasaun reseita no despeza sira Orsamentu Jerál Estadu nian sei halo liuhosi utilizasaun ba klasifikadór orsamentál sira, ne’ebé sai nu’udár estrutura klasifikasaun orgánika, klasifikasaun ekonómika no klasifikasaun funsionál.

Projetu Dekretu Governu ne’ebé halo regulamentasaun ba estrutura programa orsamentál nian sira, Estrutura liuhosi programa Orsamentu Jesrál Estadu nian maka agrupamentu despeza sira hosi objetivu, atu bele prodúz rezultadu sira.

Programa orsamentál sira sei organiza liuhosi nivel tolu, ida ne’ebé iha leten, hanaran programa, ida ne’ebé iha klaran hanaran subprograma no ida ne’ebé iha okos  hanaran atividade.

Nivel programa aprezenta objetivu jerál sira ho objetivu atu hetan rezultadu sira, nivel subprograma aprezenta objetivu espesífiku sira ho objetivu atu hetan rezultadu sira no nivel atividade aprezenta asaun lubuk ida ne’ebé kontribui atu prodúz rezultadu sira.

Kódigu ba programa orsamentál sira ne’e kompostu husi algarizmu alfanumériku hitu, husi algarizmu hitu ne’e tolu dahuluk koresponde ba nivel programa, algarizmu rua tuir-mai koresponde ba nivel subprograma no algarizmu rua ikus koresponde ba nivel atividade nian.

Jornalista: Rogério Pereira Cárceres