Hatutan.com, (22 Abríl 2022), Díli—Comissão Nacional das Eleicões (CNE) iha Sesta 22 Abríl 2022, halo abertura ba prosesu apuramentu nasionál hodi halo verifikasaun ba votu nulu no reklamadu hosi  munisipiu 13 inklui Rejiaun Administrativa Espesiál Oecusse Ambeno (RAEOA).

Prosesu verifikasaun ne’e sei hala’o durante oras 72 hahú tuku 8:00 dader to’o 24:00 kalan no sei iha oras 24 hodi fó tempu ba

Serimónia abertura ba apuramentu nasionál ne’ebé hala’o iha salaun CNE, Sesta (22/04/2022). Foto/CNE.

kandidatu sira atu hatama rekursu ka reklamasaun.

Lee mós: Lú Olo Kongratula Ramos-Horta, Espera Sei Koopera ho Órgaun Soberania Tolu

Maibé, bainhira laiha reklamasaun maka CNE sei lori ba Tribunál Rekursu (TR) hodi hetan validasaun no fó-sai rezultadu finál hosi eleisaun segunda ronde nian, tanba TR mak iha responsabilidade hodi foti desizaun bazeia ba akta ne’ebé iha.

“Servisu ne’ebé hala’o durante votasaun primeira ronde di’ak ona, maibé presiza iha kualidade no desde STAE entrega urnas mai CNE hodi halo verifikasaun ba saida de’it mak kontempla iha urnas laran, maka servisu hirak ne’e hotu sei halo ho responsabilidade, transparensia durante oras 72 hodi elabora akta provizóriu no sei iha oras 24 ba reklamasaun ka rekursu hosi kandidatu na’in-rua hafoin ne’e sei lori ba TR hodi halo analiza, deside no fó validasaun ba akta hirak ne’e,” Prezidente CNE, José Agostinho da Costa Belo hateten iha abertura ba apuramentu nasionál iha salaun CNE, Sesta (22/04/2022).

Iha apuramentu nasionál ne’e, CNE sei halo verifikasaun dadus liu-liu kona-bá votu nulu, reklamadu ne’ebé konsta iha akta.

Tanba ne’e, husu kolaborasaun hosi parte hotu-hotu tantu reprezentante kandidatu na’in-rua atu akompaña tuir regras ne’ebé iha hodi lori situasaun hakmatek atu prodús rezultadu ne’ebé di’ak no tuir ema hotu nia hakarak.

Diretór Tékniku CNE, Jóse Fonseca esplika mekanizmu verifikasaun diferente ho eleisaun primeira ronde, tanba meza tolu de’it mak sei halo verifikasaun no kada meza verifikada akta hosi munisipiu ida por ida.

Verifikasaun sei hahú ho alfabetu mak hanesan akta hosi Munisipiu Ainaro, Aileu no Baucau to’o remata.

Jornalista: Carmelita Isaac