Hatutan.com, (20 Abríl 2022), Díli—José Ramos Horta eleitu ba Prezidente Repúblika (PR) períudu 2022-2027, hafoin halakon kandidatu Francisco Guterres Lú Olo iha eleisaun Prezidensiál segunda volta ne’ebé hala’o iha loron 19 Abríl tinan ne’e.

Tuir dadus kontajen hosi Sekretariadu Tékniku Administrasaun Eleitorál (STAE), númeru eleitór ne’ebé rejistadu ba eleisaun prezidensiál segunda volta hamutuk 859.692.

Lee mós: Istri PM Taur, Isabel Ferreira Ucapkan Selamat Kepada Ramos-Horta

Hosi númeru ne’e, eleitór ne’ebé ezerse sira nia direitu votu iha sentru votasaun 1.200 iha territóriu nasionál no diaspora (Korea Súl, Austrália, Irlanda no Inglatera) hamutuk 646.389.

Hosi totál númeru votantes ne’ebé iha, José Ramos-Horta hetan votu 397.145 (62.09%) no Francisco Guterres Lú Olo hetan votu hamutuk 242.440 (37,91%).

Rezultadu ne’e hatudu José Ramos-Horta eleitu ba segunda vez nu’udár Prezidente Repúblika tanba hetan votu konfiansa maioria hosi povu Timor-Leste.

“Ho rezultadu provizóriu ne’e, ha’u la uza liafuan vitória ne’e, hanesan foin dadaun ha’u hateten, ha’u seidauk reklama vitória. Ha’u simu ona parabéns inkluindu hosi rai liur, maibé hanesan fó rezultadu atuál tuir dokumentu ne’ebé ita iha, hosi sekretáriadu kampaña nian, ke halo monitoriamentu profisionál mai hosi aktas sira ne’ebé ita hatene. Kontente tebtebes ho mandatu ne’ebé mai hosi povu, mandatu ida ke seidauk ofisiál, no ho mandatu ne’e, hanesan todan liu tiha, insentivu para servisu di’ak liután, entrega an kompletu ba mandatu ida-ne’e,” José Ramos-Horta hateten.

Premiadu nobel da pás ne’e mós promete sei hadi’a povu nia moris iha nia mandatu liu hosi servisu hamutuk ho órgaun soberanu sira seluk atu tau prioridade ba problema sosiál, hadi’a ekonomia nasaun nian no restaura hikas órden konstituisionál nu’udár meiu atu hametin no haburas demokrasia.

“Preokupasaun rua, kle’an liu mak ida ne’e, hadi’a sitauasaun umanitária sosiál, hadi’a ekonómia, hakle’an, hametin ita nia demokrasia,” nia dehan.

Iha parte seluk liu hosi pajina ofisiál Facebook, Espoza Primieuru Ministru Timor Leste, Taur Matan Ruak  hato’o felisitasaun ba José Ramos Horta ne’ebé maioria povu fó votu konfiansa hodi sai Prezidente Repúblika periodu 2022-2027.

“Hodi ha’u nia naran pesso’al, hakarak hato’o ha’u nia felisitasaun kaloroza ba Dr. José Ramos Horta ne’ebé eleitu nu’udár Prezidente Repúblika Demokrátika Timor Leste ba períudu 2022-2027, dezeza susesu boot iha servisu sira  ne’ebé sei nakonu ho pás, saúde no sabedoria,” Isabel Ferreira hateten.

Jornalista: Vito Salvadór/Rogério Cárceres