Hatutan.com, (25 Marsu 2022), Dili-Prezidente Konsellu Administrasaun Rádiu Televizaun Timor Leste, Empreza Públiku (RTTL,E.P), José António Belo, seidauk bele fó komentáriu kona-bá kazu projetu instalasaun Set-top Box/dexodificador RTTL,E.P tanba to’o agora Governu liuhusi Ministériu Asuntu Parlamentár no Komunikasaun Sosiál (MAPKOMS) seidauk entrega  projetu ne’e ba RTTL,E.P.

Notísia iha Relasaun: Kazu Projetu Set-top Box RTTL,E.P, CAC Bolu Ona Sasin Husi MAPKOMS ho RTTL

Prezidente Konsellu Administrasaun Rádiu Televizaun Timor Leste, Empreza Públiku (RTTL,E.P), José António Belo. Foto/Hatutan.com

“Sei labele komentáriu tanba projetu ne’e seidauk entrega. Se entrega ona mak ami bele ko’alia,  la entrega ha’u la ko’alia,” José Antonio Belo hateten hodi responde Hatutan.com iha Edifísiu Conselho de Imprensa de Timor Leste (CI) iha Kintal-Boot, Dili, Sesta (25/03/2022).

José António Belo hateten, projetu instalasaun Set-top Box/dexodificador RTTL,E.P, la’ós RTTL,E.P mak kaer diretamente, maibé ida-ne’e husi Governu ba Governu (Governu Timor Leste ho Governu Xina) tamba ne’e, nudá prezidente RTTL,E.P, José António Belo, seidauk bele ko’alia tamba projetu ne’e iha Governu nia okos no seidauk entrega ba RTTL,E.P.

“RTTL,E.P laiha koñesimentu kona-bá ida-ne’e, tanba projetu sei Governu nian, ne’ebé buat sira ne’e ita-boot sira ba husu ba Governu. Ami RTTL,E.P sei la halo komentáriu ba buat ne’ebé seidauk mai iha RTTL,E.P,” José Belo afirma tán.

Prezidente RTTL,E.P  salienta tan, bainhira RTTL,E.P simu ona mak foin bele  hateten dehan nia andamentu la’o oinsá, maibé buat ne’e ezekusaun Governu ba Governu ne’ebé RTTL,E.P laiha komentáriu tanba projetu Set-top Box/dexodificador RTTL,E.P ne’e Governu Cina ho Timor Leste nian.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda, nudár sósiu husi Melánia da Silva Fernandes Capela, nudár Sekretaria iha Gabinete Prezidente FFTL.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Vito Salvador