Hatutan.com, (25 Marsu 2022), Díli—Espoza Prezidente Repúblika Cidália Lopes Nobre Mouzinho Guterres, selesionada nu’udár kandidata ba dala-sia ente kandidata maihosi nasaun 50, hodi manán Amazon Watch Magazine’s Awards & Annual Global, iha The 9th South America-Africa-Middle-Asia Women Summit (SAMEAWS) Women Leaders Hall of Fame (GWLHOF).

Espoza Prezidente Repúblika Cidália Lopes Nobre Mouzinho Guterres partisipa iha The 9th South America-Africa-Middle-Asia Women Summit hala’o iha Dubai, Uni Emiradu Árabe iha 25 Marsu 2022. Foto/Média PR.

Cidália Lopes Nobre Mouzinho Guterres  simu prémiu ne’e iha loron 25 fulan Marsu perante konferénsia Internasionál ne’ebé realiza iha Burj CEO Award Summit iha Dubai partisipa hosi nasaun oioin hodi ko’alia kona-bá feto sai inspiradora ba feto hotu iha mundu.

Prémiu hosi kategoria Feto inspiradora ne’e nomeia hosi Amazon Watchs ba servisu no inspirasaun sira durante Espoza Prezidente Repúblika hala’o iha Timor-Leste (TL) liuliu luta konta dezigualdade.

Iha diskursu agradesementu, Espoza Prezidente hato’o onra boot tanba mai simu prémiu ida-ne’e no komprometida atu hasa’e oportunidade ba asesu servisu sosiál iha área edukasaun, saúde reprodutiva, protesaun labarik, eradikasaun moras hada’et no haforsa ekonomia feto.

“Ha’u Agradese ba ita boot sira nia fiar hodi selesiona ha’u ba prémiu ida-ne’e liuliu ba señor Ken Giami, Komisaun Organizadora no mós Kandidatu sira seluk ne’ebé ha’u iha oportunidade koñese liu hosi partisipasaun ida-ne’e,” Hatutan.com  sita komunikadu.

Prémiu ne’e nu’udár rekoñesementu ba feto Timor nia servisu no mós responsabilidade boot ba Espoza Prezidente Repúblika atu aprezenta ba mundu knaar feto Timor halo hodi kontribui ba dezemvolvementu Timor-Leste ne’ebé hanesan no inkluzivu.

Nia mós haksolok tanba programa ne’ebé nia hala’o loron ruma bele inspira feto maluk seluk hanesan Cidália rasik temi bebeik iha TL. 

Espoza Prezidente Repúblika Cidália Lopes Nobre Mouzinho Guterres, selesionada nu’udár kandidata ba da-sia entre kandidata maihosi nasaun 50, hodi manán Amazon Watch Magazine’s Awards & Annual Global, iha The 9th South America-Africa-Middle-Asia Women Summit (SAMEAWS) Women Leaders Hall of Fame (GWLHOF). Foto/Média PR.

“Ha’u hakarak kontinua hatutan no haforsa feto, labarik  no ema sira ne’ebé laiha kbiit atu hato’o sira nia lian, nune’e sira bele sente katak sira partense ka sai na’in ba prosesu dezenvolvementu nasaun foun ida Timor Leste. Dame ne’e posivel, maske lori tempu naruk atu atinji hodi hetan dame persiza ema hotu nia komitmentu no responsabilidade, labele lakon esperansa, labele hakiduk tanba dame buat ida ne’ebé ami bele hetan nune’e feto no ema iha fatin seluk bele hetan iha idaidak nia fatin,” nia subliña.

The 9th South America-Africa-Middle-Asia Women Summit (SAMEAWS) halibur hamutuk feto emininente no iha influénsia ho parseiru sira hosi rejiaun Amerika Súl, Áfrika, Médiu Oriente no Azia ho enfaze ba sira-nia papél krítiku iha futuru ba dezenvolvimentu ekonomia, modelu papél feto eminente ne’ebé diretamente kontribui ba dezenvolvimentu hodi luta hasoru desigualdade ne’ebé feto hasoru atu hetan mudansa tuir sira-nia hakarak.

The 9th South America-Africa-Middle-Asia Women Summit hala’o iha Dubai, Uni Emiradu Árabe iha 25 Marsu 2022.

Partisipante ba SAMEAWS maka líder feto hosi nasaun oinoin, iha governu,  akademista, investigadoras, emprezária, ativista no lider feto seniór sira seluk iha mundu.

Cidália hetan konvite hosi Amazon Watch Magazine no aprezenta ninia kandidatura iha Novembru 2021 no tuir entrevista online hodi kompete ba prémiu ne’e.

Hafoin liu prosesu entrevista, Cidália sai kandidata selesionada númeru 9 hosi país 50 ne’ebé partisipa no sai duni aprezentadora iha eventu ida-ne’e.

Cidália partisipa ativa iha Organização Popular da Mulher Timor (OPMT) hodi promove emansipasaun feto.

Iha 2011, eleita nu’udár Sekretária ba Komisaun Nasionál Juridisaun no re-eleitu  iha 2016-2021 nu’udár Sekretária ba Komisaun Nasionál Fiskais.

Jornalista: Vito Salvadór