Hatutan.com, (24 Marsu 2022), Díli- Atu bele garante kualidade hanorin no iha investigasaun sientífiku ne’ebé garante valór umanu foin-sa’e sira nian iha sosiedade,  Universidade Católica Timorense (UCT) apósta  liubá kualidade atu bele prodús intelektuál foin-sa’e sira util ba nasaun.

Notísia iha Relasaun: UCT São João Paulo II Sai “Lalenok” ba Sosiedade

Serimónia inaugurasaun edifísiu foun  UCT no lansa tinan letivu foun UCT, 24 Marsu 2022. Foto/Hatutan.com

Arsebispu Metropolitana Dioseze  Díli, Dom Virgílio do Carmo da Silva,  hateten, UCT nia misaun mak promove kriasaun, transmisaun no difuzaun krítika hosi siénsia, teknolojia, arte no kultura liu hosi artikulasaun iha ensinu investigasaun sientífika no estensaun iha domíniu oin-oin ba dezenvolvimentu integradu ser umanu  no bem-estár komunidade nasionál no internasionál liu hosi roman fiar kristaun nian.

UCT mós iha vizaun atu hanorin no iha investigasaun sientífiku proporsionadu iha edukasaun ba pesoa umana tomak, morál, espirituál no intelektuál hodi forma futuru lider Timor-Leste no mundu liu hosi auspísius fiar Katólika.

Haree ba prinsípiu no vizaun no misaun ne’ebé atu apósta ba kualidade UCT, Dom Virgílio fiar metin sei oferese kursu preopodetico ba estudante sira molok frekuente aula normál hodi hasae estudante sira nia koñesimentu iha lingua, liuliu língua portugés no inglés.

Arsebispu Metropolitana Díli, Dom Virgílio do Carmo da Silva, SDB, iha nia entrevista ho jornalista sira hateten, iha Timor Leste universidade barak ona tamba ne’e UCT hamriik la’ós atu halo kompetisaun, maibé atu kompleta ho objetivu prinsipál mak hakle’an estudu espesífiku ba foin-sa’e sira atu sira sai ema ne’ebé iha kualifikasaun no abilidade di’ak iha sosiedade no util ba nasaun.

“Igreja iha Timor Leste dezde uluk kedas hanoin ona atu harii universidade ida ne’ebé ho kor katóliku no iha nia identidade rasik ne’ebé apósta ba kualidade iha formasaun espirituál no umana,” Dom Virgílio do Carmo da Silva, iha UCT, Balide, Kinta  (24/03/2022).

Magno Sancheler UCT ne’e hatutan, UCT sei sai fatin ba promosaun língua ofisial liuliu, lian portugés, tanba ne’e, ho limitasaun iha rekursu umanu no fasilidade sira ne’ebé UCT enfrenta sei buka mellora iha tempu sira tuir mai hodi fornese edukasaun ida ho kualidade tuir padraun eskola katóliku mundiál nian.

Ramos-Horta partisipa iha serimónia inaugurasaun edifísiu foun UCT no lansa tinan letivu foun UCT nian, 24 Marsu 2022. Foto/Hatutan.com

“Ita iha ona biblioteka, laboratóriu ba kada fakuldade maske seidauk kompletu, maibé ita iha ona kondisaun atu hahú,” nia haktuir.

Diretór siénsia no teknolojia  Ministériu Ensinu Superior Siénsia no Kultura (MESSK), José Cornelio, hateten bele oferese kondisaun di’ak iha prosesu aprendijazem atu bele fó atensaun ba kualidade de ensinu hodi prodús foin-sa’e sira ne’ebé iha matenek, abilidade di’ak no neon badaen hodi kria kriatividade rasik nudár autu empregu ba an rasik no ba sosiedade.

“Nasaun presiza konkista ensinu superiór ida ne’ebé exelente no aposta kualidade hodi hariku sosiedade Timor Leste iha siénsia no teknolojia ne’ebé utíl ba dezenvolvimentu,” José Cornrlio hateten.

Nia dehan, Governu iha kompromisu atu mantein servisu hamutuk ho universidade hotu inklui UCT hodi luta ba prosesu akademiku ida mais kualifikadu.

Iha loron 8 fulan-Dezembru 2021, Uma Kreda partikulár iha Timor, espesialmente Arkidioseze Metropolitana Díli loke tan pájina foun ida iha setór edukasaun nian iha nivel ensinu superiór.

Mehi ne’ebé sai realidade, hahú kedas hosi episkopadu Dom Carlos Filipe Ximenes Belo, SDB, kontinua fali ho episkopadu matebian Dom Alberto Ricardo da Silva no ikus mai realiza duni iha episkopadu Arsebispu Dom Virgílio do Carmo da Silva, SDB.

Jornalista: Vito Salvador