Hatutan.com, (24 Marsu 2022), Díli- Governu liuhusi Gabinete Apoiu Sosiedade Sivíl (GASC, sigla portugés), transfere ona montante orsamentu  $489,000.00 hodi kompleta $3,000,000.00 ne’ebé antes ne’e Governu liuhusi Konsellu Ministru aprova ba projetu konstrusaun Igreja Parókia São José, Aimutin, Dioseze Dili.

Notísia iha Relasaun: Finaliza Igreja Aimutin presiza tan milaun rua

Kondisaun Igreja Aimutin. Foto/Hatutan.com

Arsebispu Arkidioseze Díli, Dom Virgilío do Carmo da Silva, SDB, klarifika katak konstrusaun Igreja Parókia São José Aimutin ne’ebé antes ne’e paradu tanba Governu liu husi GASC la halo transferénsia ba osan  ne’ebé kompromisu ona ho montante ikus $$489,000.00. Maibé iha fulan-Fevereiru liubá, Governu transfere ona, nune’e  projetu igreja refere hahú hikas atividade konstrusaun.

Arsebispu ne’e subliña, osan husi GASC kompleta hotu tiha, Konferensia Episcopal Timorense liuhusi arkidioseze Díli sei husu ba empreza ne’ebé responsabiliza konstrusaun Igreja Aimutin atu halo relatoriu ida kompletu hodi entrega ba iha GASC  depois GASC  ba halo auditoriu mak haree atu halo fali kontratu foun ka halo oinsa hodi bele finaliza obra Igreja Aimutin.

“Importante mak halo hotu tiha lai depois ita halo tiha avaliasaun ida husi relatoriu ne’ebé sira halo katak la iha problema ona, ami sei haree fila fali atu halo kontratu foun ka oinsa,” Dom. Virgílio do Carmo da Silva hateten.

Arsebispu ne’e sublina fukun lolos husi atrazu ba kontrusaun ne’e seidauk bele adianta buat ruma tanba sei hein relatoriu husi empreza konstrutor depois mak bele hatene nia fukun lolos husi konstrusaun ne’e atrazu tamba saida.

“Arkidioseze mós husu atu empreza konstrutor tenke halo relatoriu ida liu husi komisaun konstrusaun Igreja Aimutin atu halais relatóriu atu bele iha auditoria ida hodi buka hatene tuir osan ne’ebé durante ne’e aloka ba konstrusaun uza tuir loos buat sira ne’ebé temi iha kontratu ka lae, se buat hotu  loos ona, maka ita foin buka fali meius atu lobi hikas Governu ka oinsa hodi bele finaliza konstrusaun Igreja ne’e,” nia dehan.

Notísia iha Relasaun: Konstrusaun Igreja ‘paradu’, Sarani Parókia São José Aimutin la kontente

Jornalista: Vito Salvador