Hatutan.com, (23 Marsu 2022), Dili-Polísia Nasional Timor-Leste (PNTL) liuhosi Komandu Munisípiu Dili, hein hela pesoál administrasaun públiku balun ne’ebé pertense ba motorizada Estadu nian rua, ne’ebé PNTL halo apreensaun iha ámbitu kampaña ba eleisaun Prezidente Repúblika, foin lalais ne’e.

Notísia iha Relasaun: PNTL Halo Apreensaun Ba Motór Estadu Ida Tuir Kampaña Kandidatu PR Lú Olo

Motorizada sira ne’ebé PNTL halo apreensaun iha ámbitu kampaña eleisaun ba Prezidente Repúblika. Foto/Hatutan.com

Motorizada Estadu nian rua ne’e, PNTL halo apreensaun iha Kuarta (16/03/2022) bainhira apoiante sira utiliza hodi ba partisipa iha atividade kampaña eleitorál ikus hosi kandidatu Prezidente Repúblika (PR) ho númeru sorteiu 06, Francisco Guterres “Lú Olo” nian iha Tasitolu, Dili.

“Até agora, ita nia transporte Governu liu-liu motorizada Estadu nian rua ne’ebé mak ita prende ne’e, na’in-sira seidauk mai aprezenta. Ita hein na’in-sira mai aprezenta, depois ita bele identifika funsionáriu sira ne’e hosi ministériu ida ne’ebé,” Komandante Polísia Tránzitu (Poltranz), Munisipiu Dili, Inspetór Xefe Domingos Sarmento Gama hateten ba jornalista sira iha kna’ar-fatin, Komandu Caicoli, Kuarta (23/03/2022).

Kona-bá sansaun, Komandante Domingos Sarmento Gama esplika, infrasaun ne’ebé mak sira halo, tenke selu nafatin koima ka multa ba kofre Estadu.  Maibé, tanba pekulatu de uzu ba patrimóniu Estadu, maka nia prosesu sei diferente ho motorizada sira ne’ebé privadu.

Prosesu ba motorizada sira ne’e, parte PNTL sei submete relatóriu ba iha kada ministériu ne’ebé identifikadu, no ministériu ne’e rasik maka sei loke prosesu investigasaun no bele kontinua ba CAC (Comissão Anti Corrupção), bele mós hato’o ba Ministériu Públiku (MP), no to’o iha Tribunál.

Tuir dekretu lei númeru 06/2003 kona-bá kódigu estrada hateten katak, transporte sira ne’ebé mak komete infrasaun, la foti durante loron 90 nia laran (fulan tolu), sei afavór ba Estadu.

“Sidadaun sira ne’ebé maka involve iha infrasaun ruma, dentru loron 90 ne’e, hakarak ka lakohi tenke mai trata dokumentu hodi kumpre nia devér ba selu multa iha banku, mak liu ona loron ida, ne’e afavór ona ba patrimóniu,” Domingos esplika.

Operasaun PNTL nian ba kampaña eleitorál hosi kandidatu PR sira durante semana-rua, hahú hosi loron 02 to’o loron 16 fulan-Marsu, liu-liu iha kapitál Dili, prende motorizada hamutuk 484, hosi apoiante sira, tanba viola lei seguransa rodoviária.

Jornalista: Rogério Pereira Cárceres