Hatutan.com, (17 Marsu 2022), Dili-Kampaña loron-tolu ikus, Segunda-Kuarta (14-16/03/2022), iha Dili, Polísia Nasionál Timor-Leste (PNTL) halo Apreensaun ba motór hamutuk 300 tanba komete infrasaun ba Lei Kódigu Estrada.  

Notísia iha Relasaun: PNTL Halo Apreensaun Ba Motór Estadu Ida Tuir Kampaña Kandidatu PR Lú Olo

PNTL Munsípiu Dili halo apreensaun ba motór hamutuk 300 iha ámbitu kampaña loron-tolu ikus iha Dili, 14-16 Marsu 2022. Foto/Hatutan.com

Kampaña loron-tolu ikus iha Dili ne’ebé mobiliza apoiante atus ba atus mai husi Kandidatu Prezidente Repúblika (PR), Francisco Guterres “Lú Olo”, Kandidatu PR José Manuel Ramos-Horta, Kandidatu PR Jenerál Reformadu Lere Anan Timur ho Kandidata PR, Armanda Berta dos Santos.

Motór militante no simpatizante no militante husi partidu sira hanesan FRETILIN, CNRT ho KHUNTO  ne’e nian prende husi loron dahuluk, 14 Marsu, hamutuk motór 40, loron daruak tuir mai, 15 Marsu, hamutuk motór 112 no loron datoluk, 16 Marsu, hamutuk motór 148.

“Iha tempu ne’ebá mós ami konsege foti sai motorizada hirak ne’ebé ami identifika, uza kanu-resin, balu la uza espellu, balu la taka kapasete, balu tula ema na’in-tolu, ami konsege foti duni motorizada sira-ne’e no agora daudaun iha hela komandu Munisípiu Dili,” Komandante PNTL Munisípiu Dili, Superintendente Xefe Polisia, Henrique da Costa hateten ba jornalista sira, hafoin serimónia formatura jerál iha Kuartél Jerál PNTL, Caicoli, Dili, Kinta (17/03/2022).

Motorizada hirak ne’e nia na’in-sira simu hotu ona billete husi Polísia Tránzitu Munisípiu Dili atu kumpre sira-nia obrigasaun selu koima ka multa  iha Banku molok sira foti fali sira nia motór.

“Sira ne’ebé mak uza kenalpot-resin, ita sei hasai, ita husu para atu nune’e na’in hodi lori kenalpoot ne’ebé estandar, atu nune’e bele ba monta fila-fali, para nune’e bele foti. Depois sira ne’ebé mak laiha espellu, tenke ba lori ho espellu, para selu hotu mós, hodi monta fila-fali espellu, para atu nune’e bele foti sai,” Komandante Henrique da Costa esplika.

Durante operasaun ka pasa revista iha kapitál Dili iha ámbitu kampaña kandidatu PR sira-nian, Komandu PNTL Munisípiu Dili hetan apoiu  seguransa hosi Unidade Espesiál  Polísia (UEP), Unidade Patrullamentu Fronteira (UPF) ne’ebé mak destakadu iha Postu Seguransa iha Aeroportu Nicolau Lobato, Comoro, Unidade Polísia Marítima (UPM), Sentru Formasaun Polísia (CFP), no Kuartél Jerál PNTL.

Jornalista: Rogério Pereira Cárceres