Hatutan.com (4 Fevereiru 2022) Díli—Tribunál Distritál Díli (TDD) liu hosi alegasaun hosi Prokuradora Benvinda do Rosário husu ba TDD, atu aplika pena ne’ebé adekuadu no tuir krime ne’ebé imputa ba arguidu Joel Viegas ba krime abuzu de konfiansa agravadu.

Tribunál Distritál Díli (TDD). Foto/Hatutan.com.

Prokuradora husu ne’e tanba arguido utiliza sala konfiansa ne’ebé nia kolega lezadu Frederico Soares Sarmento fó, hodi garante fali lezadu nia karreta baskolante ba Atanasio da Cruz.

Maibé Defensór Públiku ne’ebé fó asisténsia ba arguidu Amado Babtista, husu ba Tribunál atu absolve arguidu hosi krime abuzu de konfiansa agravadu, tanba la aseita ho alegasaun hosi Prokuradora Benvinda do Rosário, tanba la prienxe elementu krime ne’ebé iha bazeia ba arguidu nia deklarasaun katak, arguidu ba garante hela lezadu nia karreta hodi foti ema nia motór tanba nia apa mate iha Dili.

Prokuradora Benvinda do Rosário mantein ho nia alegasaun, tanba konsidera faktus provadu katak arguidu lori duni lezadu nia karreta baskolante hodi fó garante ba Atanasio da Cruz, ne’ebé ikus mai lezadu mak tenki ba seluk fali.

Hafoin alegasaun, juiz prezide adi’a hikas julgamentu ba loron seluk hodi rona desizaun.

Antes ne’e, tuir akuzasaun ne’ebé iha katak, arguidu ho lezadu nu’udár kolega di’ak, tanba ne’e lezadu entrega nia karreta vaskolante ida ho númeru matrikula 57-348 TIS ba arguidu nu’udár kondutór hodi servisu buka osan no kada fulan selu $200.

Maibé, iha tinan 2017 lezadu nia vaskolante hetan kontratu ho kompañia ne’ebé hala’o servisu iha Projetu Kablaki iha Suai ho kada fulan hetan pagamentu $1.700.

Tanba ne’e, lezadu fó konfiansa ba arguidu kaer lezadu nia karreta hodi hala’o servisu iha Suai, maibé ikus mai iha fulan Outobru to’o Novembru 2017, arguidu Ia lori lezadu nia karreta ba uma, no lezadu buka tuir maibé telefone ba arguidu bosok tun sa’e de’it.

Tanba ne’e, lezadu buka tuir arguidu to’o iha Suai no lezadu hetan karreta iha fali Atanasio da Cruz Abel mak kaer no lezadu husu tuir afinál arguidu garante tiha ona lezadu nia karreta ba Atanasio hodi impresta motorizada hodi ba Dili no ikus mai Atanasio haruka lezadu selu fali motorizada ne’ebé arguidu lori ba Díli ho valór $1.800, maibe to’o agora lezadu haruka arguidu selu fali lezadu nia osan maibé la selu.

Tanba ne’e MP akuza arguidu ba pratika krime abuzu Konfiasan agrvadu ne’ebé previstu iha artigu 257 hosi kódigu penál TL.

Audiénsia julgamentu iha Sesta 04 Fevereiru, prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradora Benvinda do Rosário no arguidu hetan asisténsia legál hosi Defensór Públiku Amado Babtista.

Jornalista: Carmelita Isaac