Hatutan.com, (28 Janeiru 2022), Díli- Prezidente Repúblika (PR), Francisco Guterres “Lú Olo” liuhusi dekretu nú.4/2022, 28 Janeiru, ezonera Tenente Jenerál Tito da Costa Cristóvão “Lere Anan Timur” husi kargu Xefe Estadu Maiór Jenerál FALINTIL-Forsa Defeza Timor Leste (F-FDTL) no halo promosaun ba Major Jenerál Domingos Raul “Falur Rate Laek” ba postu Tenente Jenerál tuir dekretu PR nú.5/2022.

Notísia iha Relasaun: Governu Propoin ba PR Lú Olo Ezonera Lere no Nomeia Falur

Xefe Estadu Maiór Jenerál F-FDTL, Tenente-Jenerál Lere Anan Timur hasoru malu ho PR Francisco Guterres Lú-Olo. Foto/Mídia PR

Hafoin simu proposta reformasaun husi Tenente Jenerál Lere Anan Timur ne’ebé aprezenta husi Konsellu Ministru iha loron 21 fulan-Janeiru 2022, Prezidente Repúblika  konvoka kedas reuniaun Konsellu Superior Defeza no Seguransa (KSDS) iha loron 27 fulan-Janeiru ne’e, hodi rona opiniaun membru KSDS sira-nian molok PR hola desizaun tuir Konstituisaun Repúblika Demokrátika Timor Leste (KRDTL) artigu 86 alínea m.

Bainhira Xefe Estadu Maiór Jenerál reforma husi nia kargu proposta nomeasaun sei mai husi Governu no tuir estatutu militár nú.1 husi artigu 259 ezije atu kargu Xefe Estadu Maiór Jenerál monu ba Tenente Jenerál nomeadu ne’ebé antes ne’e assume kargu nu’udar vise-xefe estadu maiór Jenerál forsa armada no verifika tuir kondisaun ne’ebé aplika iha artigu 87 no 89 husi estatutu militár ne’ebé vigora.

Sita husi publikasaun Jornál da Repúblika, edisaun 28 Janeiru 2022, katak hafoin halo ezonerasaun ba Tenente Jenerál Lere Anan Timur husi kargu Xefe Estadu Maiór F-FDTL, Prezidente Repúblika Francisco Guterres “Lú Olo” halo kedas nomeasaun ba Tenente Jenerál Falur Rate Laek hodi assume responsabilidade nu’udar Xefe Estadu Maiór Jenerál F-FDTL tuir dekretu PR nú. 6/2022.

Tenente Jenerál Lere Anan Timur aprezenta pedidu reforma ba Governu liuhusi Ministériu Defeza, iha loron 17 fulan-Janeiru 2022 no Reuniaun Konsellu Ministru aprova pedidu ezonerasaun ne’e iha loron 21 fulan-Janeiru 2022.

Jornalista: Vito Salvadór