Hatutan.com, (26 Janeiru 2022), Díli– Tribunal Distritál Díli (TDD) kontinua halo julgamentu ba krime violasaun segredu justisa ne’ebé deskonfia involve eis-Diretór Komisaun Justisa no Paz (KJP) Dioseze Dili, arguidu Padre Hermínio Fátima Gonçalves no arguidu José Cardoso Moreira, Andre Gonçalves no arguida  Libania Martins Amaral.

Notísia iha Relasaun: Na’in Tempo Timor José Belo ho Jornalista António Sampaio Sasin Bá Kazu Relatóriu Topu Honis

Jornalista sira hlao entrevista ho António Sampaio nu’udar jornalista Ajensia Notisioza LUSA ne’ebé akompaña mós husi Diretór no eis-jornalista Tempo Timor, José Belo. Foto/Hatutan.com

Iha julgamentu kontinuasaun, Kuarta (26/01/2022), aprezenta sasin António Jose Sampaio hanesan jornalista Ajénsia Notisioza Portugeza LUSA ho José António Belo, nu’udar Diretór no eis-jornalista Tempo Timor (TT) .

Sasin António Jose Sampaio rekoñese publika notísia ida sobre relatóriu husi KJP Dioseze Dili, maibé fontes husi notísia ne’e maka hanesan primeiru deklarasaun Prokuradór Jerál Repúblika (PJR)  tempu ne’ebá José da Costa Ximenes, segundu sita referénsia husi dokumentu kona-bá relatóriu peskiza husi KJP, terseiru fontes kredivel ne’ebé fó sai katak rezultadu relatóriu ne’e loos.

Hanesan jornalista  António Sampaio hala’o knar bazeia de’it ba kódigu  étika jornalistika ne’ebé garante fontes segredu (fontes anónima) tanba ne’e António Sampaio la bele temi ema ka fontes ne’ebé maka fó dokumentu rezultadu relatóriu refere.

António Sampaio deklara hetan kopi ida ba relatóriu ne’e maibé konteúdu notísia bazeia ba deklarasaun PJR ho konteúdu sobre prosesu akuzasaun ba kondenadu eis padre Ricard Dashback.

Sasin José Antonio Belo ne’ebé iha tempu ne’ebá hanesan Diretór Tempu Timor deklara depois  hetan dokumentu relatóriu ne’e tenta konfirma ho parte KJP dala rua, maibé laiha resposta tanba ne’e nia parte haree no halo rezumu ba relatóriu ne’e hodi publika, tanba interesante tebes primeiru rezultadu peskiza diferente ho kazu ne’ebé antes ne’e iha ona relasiona ho kazu eis padre kondenadu Ricard Dashback, segundu konteúdu relatóriu ko’alia kona-ba mafia justisa.

“Bainhira Dioseze husu deskulpa ba públiku kona-bá publikasaun rezultadu relatóriu ne’e, ami mós la kontinua halo notísia,” José Belo hateten iha audiénsia julgamentu ne’e.

Hafoin rona sasin na’in-rua, Tribunal adia hikas julgamentu ba loron seluk hodi kontinua rona sasin Barbara Nazareth husi JU,S.

Relasiona ho dokumentu relatóriu  kazu Topu Honis nian ne’e maka iha lolon 6 fulan-Outubru 2020, Arsebispu Arkidioseze Metropolitana Díli, Mgr. Virgílio do Carmo da Silva, SDB, ezonera ona  Padre Hermínio Fátima Gonçalves, hosi nia kargu nu’udar Diretór CJP Dioseze Díli.

Audiénsia julgamentu ne’e preside husi juiz singular Evangelino Belo, MP reprezenta husi Prokuradór Matias Soares no arguidu sira hetan asisténsia legal husi Advogadu privadu Miguel Faria.

Jornalista: Carmelita Isaac