Hatutan, (21 Janeiru 2022) Dili– Centro Nasionál Chega!, Institutu Públiku (CNC!,I.P)  prezerva arkivu audio, surat-tahan no fotografia hamutuk 55.000-liu kompostu husi violasaun direitus umanus, istória rezisténsia, polítika, relasaun esterna, apoiu komunidade internasionál liu husi karta no operasaun militár Indonézia iha Timor Leste durante periodu konflitu 1974-1999.

Diretór Ezekutivu Centro Chega!, Hugo Maria Fernandes. Foto/CNC

Arkivu hirak ne’e mai husi Komisaun Akollamentu Verdade no Rekonsiliasaun (CAVR, sigla portugés), Komisaun Verdade no  Amizade (CVA), inklui CNC ne’ebé simu husi entidade no organizasaun iha rai-laran no rai-li’ur.

Arkivu hirak ne’e iha kategoria rua, primeiru iha arkivu balun ema seluk bele asesu no segundu arkivu ne’ebé ema seluk seidauk bele asesu relasiona ho entrevista ho lider ne’ebé lidera funu durante 1974, iha dokumentu balun  labele fó sai, tanba iha sensibilidade polítika ne’ebé seidauk permite no ema seluk seidauk prontu atu simu faktu ne’ebé akontese no bele prejudika estabilidade.

“Iha kategoria arkivu balun ema bai-bain nian ne’ebé sidauk bele publika maka hanesan violasaun seksuál inklui mós entrevista ho lider funu nian tanba iha sensibilidade polítika no bainhira la kontrola bele fó risku tanba iha funu buat hotu-hotu la’ós lao di’ak de’it,” Diretór Ezekutivu CNC, Hugo Maria Fernandes, ba jornalista sira, hafoin halo abertura ba workshop diseminasaun arkivu istóriku CAVR iha edifísiu CNC Balide, Sesta (21/01/2022).

Hugo afirma to’o agora Timor-Leste seidauk iha lei kona-bá arkivu nasionál, liu-liu enkuadramentu jurídiku hodi fó protesaun ba arkivu ne’ebé iha, maske CNC halo ona esforsu hodi lori lei ne’e aprezenta iha Ministériu Administrasaun Estatál (MAE), maibé to’o agora seidauk iha rezultadu, tanba ne’e, CNC utiliza lei arkivu husi padraun internasionál hodi determina durasaun tempu ba publikasaun arkivu ne’e rasik hodi fo determinasaun ba arkivu ne’ebé bele loke depois  tinan 25 to’o tinan 50.

Jornalista: Carmelita Isaac