Hatutan (06 Janeiru 2022) Díli—Tribunál Distrital Díli (TDD) iha Kinta loron 06 fulan ne’e, kontinua hala’o julgamentu ba krime partisipasaun ekonómika iha negósiu no administrasaun danoza, ne’ebé deskonfia involve eis Ministru Comércio Indústria e Ambiente (MCIA), atuál deputadu bankada PD, arguidu António da Conceicão “Kalohan” ho arguidu na’in haat seluk.

Arguidu na’in-haat seluk ne’e nu’udár funsionáriu públiku MCIA nian, inklui diretór kompañia Kaninuk Star Unipessoal Lda, arguidu AC, arguida ZIB, arguidu GPdSC, no PMCSV relasiona ho fornesimentu ekipamentu laboratóriu indústria hosi orsamentu kapitál menór ho montante globál $200.000,00 iha tinan 2014, ne’ebé hamout osan Estadu ho montante $143,500.00.

Notisia iha Relasaun:Tribunál bolu António “Kalohan” ho funsionáriu MCIA na’in haat

Iha audiénsia julgamentu kontinuasaun arguidu PMCSV ne’ebé iha tempu ne’ebá hanesan Diretór kompañi Kaninuk Star Unipessoal, Lda deklara katak, ekipamentu labotóriu indústria hatama kompletu no dala ida de’it iha tinan 2015.

“Antes ne’e sira esplika katak garantia ba utilizasaun ekipamentu ne’e ho durasaun tempu fulan 12, maske iha kontratu laiha,”arguido deklara iha audiénsia.

Hafoin rona arguidu, Tribunál adi’a hikas julgamentu ba loron seluk hodi kontinua rona arguidu António da Conceicão.

Antes ne’e, MP akuza Arguidu sira ba prátika krime partisipasaunekonómika iha negósiu no administrasaun danoza, burla agravadu, falsifikasaun dokumentu ne’ebé previstu iha artigu 299, 274, 266, 267 hosikódigu Penál TL.

Audiénsia julgamentu prezide hosi juís kolektiva Maria Solana, Ana Paula Fonseca, Ivan Suritai, Ministériu Públiku reprezenta hosi Prokuradór Rogério Viegas no arguidu sira hetan asisténsia legál hosi Defensór Públiku no Advogadu Privadu Pedro Camões, Januário Martins, Câncio Freitas no Manuel Sarmento.

Jornalista: Carmelita Isaac