Hatutan.com, (05 Janeiru 2022) Díli-Tribunál Distritál Díli (TDD) liuhusi juiz koletivu António Carmona, Ercilia de Jesus no Albertina Neves, Kuarta (5/01/2022),  hala’o primeiru julgamentu ba krime burla agravadu ho nuc 0148/18/PDDIL ne’ebé deskonfia involve guarda prizionál na’in-ida, arguidu HF ho nia espoza arguida MC tanba deve  lezada IJ  nia osan ho montante $5.400 seidauk selu.

Tribunál Distritál Dili.

Iha audiénsia julgamentu arguidu deklara ba Tribunál katak total montante ne’ebé hakerek iha akuzasaun laran la loos, tanba arguidu ba deve lezada nia osan primeiru ho montante $500 no segundu $400, maibé liu tia fulan tolu depois de osan projetu ba fornesimentu hahán ba guarda prizionál sai arguidu ho arguida diretamente ba iha lezada nia uma hodi entrega osan ho montante $2.500,00, maibé lezada dehan montante ne’e hanesan osan funan de’it, maibé osan isin ho total $900 seidauk fó.

“Depois osan projetu sai ha’u ho ha’u nia fen ba entrega osan ho montante $2.500 ba lezada, maibé lezada dehan ne’e hanesan osan funan de’it tanba ne’e bainhira lezada lori kazu ne’e bai ha Ministériu Públiku, ha’u entrega tan karreta ida ba lezada, tanba ne’e lezada dehan kazu ne’e taka ona maibé lezada kontinua ezije osan $900,” deklara arguidu iha audiénsia.

Iha sorin seluk, lezada konfirma katak arguidu ho arguida ba foti osan dala tolu primeiru ho montante $2.000, segundu $2.400,00 no ikus liu 1.000, no to’o agora arguidu ho arguida seidauk fó fila osan ne’e, maibé arguidu fó de’it karreta ida maibé daudaun labele uza tanba aat.

“Bainhira ha’u ba husu arguida inklui nia alin sira trata no duni ha’u tanba ne’e ha’u hato’o keima ba Ministériu Públiku,” lezada deklara.

Hafoin rona lezada, Tribunál adia hikas julgamentu ba loron seluk hodi kontinua rona sasin sira.

Tuir akuzasaun husi Ministériu Públiku (MP) katak iha loron 6 fulan-Janeiru 2016, arguidu ho arguida  hanesan fen ho la’en ba iha lezada nia uma atu empresta osan, no lezada hatán hodi halo deklarasaun katak semana rua fó fila fali ho nia funan 30% no mós dokumentu karreta Avanza kór mutin hanesan garantia no lezada mós entrega osan ho valor $2.000.

Liu tiha semana rua arguidu ho arguida ba husu atu empresta tan no lezada mós entrega tan osan ho montante $400  hodi promete semana rua fó fila fali ho funan ne’ebé hanesan ho razaun kaer projetu hodi fornese hahán ba dadur sira iha Gleno.

Liu loron tolu arguidu ho arguida husu empresta tan osan $3.000 ho razaun osan ba projetu seidauk sai, tanba ne’e lezada mós entrega tan $ 3.000, maibé ho funan ne’ebé hanesan ho antes arguido ho arguida foti ne’e, tanba ne’e total osan ne’ebé lezada fó ba arguidu ho arguida  $5.400, maibé to’o iha loron ne’ebé termina lezada ba husu arguidu ho arguida atu selu ona lezada nia osan, maibé arguido fó fali livrete motor ho ema seluk nia naran no la’ós karreta ne’ebé antes ne’e sai hanesan garantia hodi foti osan.

Konsekuénsia hosi arguidu no arguida nia hahalok halo lezada Iakon nia osan ho montante $5.400 ne’ebé to’o agora seidauk fó fila, tanba ne’e MP akuza arguidu ho arguida ba pratika krime burla agravada ne’ebé previstu iha artigu 267 husi kódigu penal Timor Leste.

Reprezenta Ministériu Públiku iha audiénsia ne’e Prokuradór Reinato Berenahak no arguidu sira hetan asisténsia legal husi Defensor Públiku.

Jornalista: Carmelita Isaac