Hatutan.com (03 Dezembru 2021) Dili—Dili Dialogue Forum 2021, ne’ebé organiza hosi Conselho Imprensa (CI), no hala’o durante loron rua hahú hosi 02 to’o 03 Dezembru, konsege prodús rekomendasaun ha’at ne’ebé sei aprezenta ba Governu hodi bele tau iha planu tinan 2023 relasiona ho tema “média konvensionál iha era dizitalizasaun”.

Partisipante iha Dili Dialogue Forum 2021, ne’ebé hala’o iha salaun Delta Nova, Sesta (03/12/21). Foto/CI

Pontu importante haat ne’ebé sai hanesan rekomendasaun importante iha forum dialogue ne’e mak hanesan, primeiru iha polítika Orsamentu Jerál Estadu (OJE) 2021 Governu bele fó apoiu ba média konvensionál sira atu  promove média konvensionál iha era dijitalizasaun, hodi hasa’e kontribuisaun joven ba leitura.

Notísia iha Relasaun:Conselho de Imprensa Realiza Atividade DDF 2021

Rekomendasaun segundu maka, dezenvolve polítika ba utilizasaun média dijitál no promove média dijitál tuir konstektu sósiu kulturál, polítika, ekonomia TL nian ne’ebé presija kria polítika hodi reintrega dezenvolvimentu entre Ministériu  padraun dijitalizasaun.

Terseiru, husu Governu liu hosi Ministériu Edukasaun Joventude no Desportu (MEJD) atu konsidera kurríkulum nível sekundáriu no universitáriu ba média literasia ho matéria teknolojia no multimedia no kuartu maka promove dezenvolvimentu kompeténsia profisionál téknika intelektuál jornalista iha área dijitál ne’ebé presija halo formasaun ba jornalista.

“Rekomendasaun hirak-ne’e sei aprezenta ba plenária CI nian hodi hetan apresiasaun hosi Prezidente CI ho nia membru-sira no sei haruka ba Parlamentu Nasionál no Governu,” Diretór Ezekutivu CI, Rigoberto Monteiro hateten iha aprezentasaun rezultadu produsaun, iha enseramentu Díli Dialogue Forum 2021, ne’ebé hala’o iha salaun Delta Nova, Sesta (03/12/21).

Dili Dialogue Forum 2021. Foto/CI.

Hatán ba rekomendasaun ne’e, Ministériu Asuntu Parlamentar no Komunikasaun Sosiál (MAPKOMS), sei hamrik iha média nia sorin, hodi haree posibilidade saida mak bele ajuda maibé la taka dalan atu hamate liberdade de espresaun.

“Iha VIII Governu konstituisionál bainhira simu pose, iha ninia programa oinsá atu bele apoiu média sira liu hosi dalan legál, infelismente iha tinan kotuk Prezidente Repúblika veta lei ne’ebé atu fó dalan ba Governu oinsá bele fó subsídiu ba média sira, maibé ha’u hanoin ba oin ezersísiu bo’ot ida, la’ós de’it Governu nia responsabilidade, maibé presija iha diskusaun entre parte hotu-hotu, nune’e bele fó sulusaun di’ak ba situasaun ne’e,” Francisco Jerónimo, hateten iha intervensaun, bainhira ensera dialogu ne’e.

Kona-bá Média konvensionál iha era dijitalizasaun ne’e, depende ba merkadu ne’ebé mak makás liu iha área dijitalizasaun maka média konvensionál mós tenki hakás an, hodi halo ajustamentu ho situasaun ne’e.

Tanba ne’e, MAPKOMS konsidera katak, dezafiu ba ema hotu-hotu hodi adapta ho situasaun ne’e inklui ba média, jornalista no Governu, maibé Governu nafatin fo autorizasaun.

Eis Prezidente Repúblika, José Ramos Horta, mak halo abertura ba dialogu ne’e, no mós  sekuénsia primeiru maka Fahe Esperiénsia Oinsá Mídia Konvensionál iha Era Dijitalizasaun iha Rejionál hanesan Indonézia, Thailandia no Timor-Leste.

Sekuénsia segundu maka Indústria Mídia Konvensionál iha era dijital no Impaktu Pademia ba Dezemvolvimentu Emprezariál.

Jornalista: Carmelita Isaac