Hatutan.com, (28 Outubru 2021), Díli-Asosiasaun Majistratura no Jurídiku Timor-Leste (AMJTL), Sesta (29/10/2021), haruka karta preokupasaun no lamentasaun ba Parlamentu Nasionál (PN) hodi kontesta ezisténsia komisaun rekrutamentu (KR) ba juiz, tuir AMJTL katak komisaun ne’e  viola independénsia Tribunál no prinsípiu separasaun podér relasiona ho aprovasaun ba proposta lei númeru 28/V/3 Organizasaun Judisiária.

Prezidente AMJTL, Antonino Gonçalves. Foto/Espesiál

Konteúdu husi proposta lei númeru  28/V/3 Organizasaun Judisiária hateten forma komisaun rekrutamentu ba juis ne’ebé atu ba tur iha Tribunál Supremu Justisa, ne’ebé antes ne’e AMJTL mak asume knar ida-ne’e.

Tuir Konstituisaun RDTL artigu 128 hateten;

1. Konsellu Superiór Majistratura Judisiál nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juis sira.
2. Juis Prezidente Tribunál Supremu Justisa nian mak prezide Konsellu Superiór Majistratura Judisiál, ne’ebé halo parte vogál sira tuirmai ne’e;
3. a) Ida, Prezidente-Repúblika mak hili;
4. b) Ida, Parlamentu Nasionál mak foti;
5. c) Ida, Governu mak hili;
6. d) Ida, Majistradu Judisiál mak hili husi sira leet.
7. Lei maka regula Konsellu Superiór Majistratura Judisiál nia kompeténsia, organizasaun no nia knar.

No iha artigu 69 hateten Órgaun soberania sira, iha sira-nia relasaun ba-malu no bainhira hala’o knaar, tenke tuir prinsípiu separasaun no interdependénsia kbiit nian ne’ebé iha Lei-Inan nia laran.

Bazeia ba artigu rua ne’e, AMJTL konsidera proposta lei nu 28/V/3 Organizasaun Judisiária viola konstituisaun artigu 128 no prinsípiu separasaun de podér ho idak-idak nia independénsia hodi labele hadau AMJTL nia knar tuir Konstituisaun.

“Husi proposta lei nu 28/V/3 Organizasaun Judisiária iha artigu balun ne’ebé sita no atu forma komisaun rekrutamentu hodi halo selesaun, rekruta no avalia juis hodi ba tur iha Tribunál Supremu Justisa no ida-ne’e ami la aseita tanba knar ne’e fó ona ba AMJTL tuir Konstituisaun artigu 128 no laiha órgaun ida ba hasai fali knar AMJTL hodi nomeia ka forma fali komisaun rekrutamentu, tanba ne’e viola ona  Konstituisaun no prinsípiu separasaun podér ne’ebé hadau ema seluk nia knar,” prezidente AMJTL, Antónino Gonçalves hateten hodi responde  Hatutan.com via telefónika, Kinta (28/1020/21).

Konteúdu husi karta AMJTL ba PN atu husu tenke halo mudansa ba artigu balun iha proposta lei nu 28/V/3 Organizasaun Judisiária hodi labele hamosu komisaun rekrutamentu, tanba bele afeta ba independénsia juis no Tribunál.

Iha tempu badak AMJTL sei halo mós karta opiniaun ba Prezidente Repúblika relasiona ho  proposta lei nu 28/V/3 Organizasaun Judisiária liu-liu kona-bá komisaun rekrutamentu.

Antes ne’e, PN aprova finál globál ba proposta lei rua mak hanesan lei númeru 28/v/3 organizasaun funsionamentu dos tribunais ka projeitu lei númeiru 19/V/3 organizasaun judisiária, no projetu lei númeru 21/V/3 estatutu majistradu judisiais ho objetivu atu reforsa di’ak liu servisu iha setór judisiáriu liu-liu iha funsionamentu hodi bele harii sistema judisiáriu ne’ebé forte ho kualidade.

Jornalista : Carmelita Isaac