Hatutan.com, (28 Outubru 2021), Dili—Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Lere Anan Timur, husu ba kadete foun sira ne’ebé oras ne’e partisipa hela formasaun militár iha Sentru Formasaun no Terenu (CFT), Nicolau Lobato Metinaro, atu labele halimar ho instituisaun militár.

Kadete F-FDTL na’in 600 rekrutadu hahú aprezenta iha Kuartél Jenerál Fatuhada, hodi prepara an atu submete ba formasaun iha Sentru Formasaun no Treinu Metinaro. Foto/Hatutan.com.

Tenente Jenerál Lere Anan Timur  alerta ne’e tanba antes ne’e, iha semana  dahuluk treinamentu militár ba kadete foun na’in 600, iha na’in-ida hosi munisípiu Lautém  husu rejigna an hosi militár, tanba sente todan.

Iha 20 Outubru 2021, oras madrugada, kadete foun Adélio Fernandes do Rego, hosi munisípiu Manufahi, nu’udár membru rekrutadu foun ida ne’ebé halai sai mós hosi kazerna militár Metinaro, mai hela tiha iha uma, área Bekusi Sentru, Suku Bekora, postu administrativu Kristu Rei.

Servisu intelijénsia militár nian (J2), ho membru hosi unidade Polísia Militár (PM), deskobre no kaptura kedan hodi ba halo detensaun durante oras 72 iha kuartél PM Kintál-boot, Dili.

“Kadete ida foin sai no Polísia Militár kaer fila-fali ona, ne’e tenke fila. Agora ba oin maka ne’e, ó mate de’it mak lori ó nia isin sai hosi kazerna militár. Ema ida la sai ona. Ain no liman tohar  ba kura mai fali, mate entaun maka ne’e ona, lori nia sai. Sé mak haruka uluk ó mai. Ema ida la obriga tanba ne’e labele halimar!,” Tenente Jenerál Lere Anan Timur, hateten iha Kuartél Jenerál, Fatuhada, Kinta (28/10/21).

Lere Anan Timur mós alerta tan katak, iha militár, hanesan soldadau la manda buat ida.

“Ha’u mak sei joven ne’e, ha’u lakohi tama militár tanba iha ne’ebá kuandu ó pasa prontu ne’e di’ak ona, maibé ida ne’ebá ne’e soldadu. Soldadu ne’e la manda buat ida. Ó nian mak loron kalan haruka ó, mate mós, ba mate de’it. Ó lalika dehan, ha’u lakohi. Joven sira ne’ebé agora dehan atu fila fali ne’e, la fila ona,” Lere Anan Timur, hateten.

Iha inísiu molok formasaun, Komandu F-FDTL fó kedan prazu tempu ba kadete-sira durante semana ida, bainhira sente treinamentu ne’e todan, bele deside fila-fali ba hamutuk ho família. Maibé, depois semana ida mai to’o ohin loron, komandu sei la tolera membru foun atu sai.

Kritéria atu tama militár, primeiru tenke iha preparasaun mentál, tanba ema mentál di’ak mak bele halo buta hotu-hotu, no segundu tenke iha fizíka di’ak.

Jornaliasta: Rogério Pereira Cárceres