Hatutan.com, (06 Dezembru 2024), Díli- Governu Timor-Leste a-favór ka aseita ba pedidu estradisaun Governu Filipina nian hasoru nia sidadaun fujitivu Arnolfo Teves Jr, maibé tenke hein desizaun definitiva hosi Tribunál Supremu Justisa (STJ).

Lee Mós: Horta Afirma Fujitivu Arnolfo Teves Jr La Prienxe Rekizitu Azíliu Polítika iha Timor-Leste

Ministru Justisa Sergio Hornai. Foto/dok

Ministru Justisa (MJ), Sérgio de Jesus Fernandes da Costa Hornai, reafirma fali katak, hahú kedas iha loron 13 fulan-Abríl 2024, nia rasik halo tiha ona desizaun polítika ida, hafoin koordena, konsulta ho xefe governu, relativamente kona-bá kestaun ne’e.

“Ha’u hatete tiha ona dehan katak, Governu iha desizaun própriu bá ida ne’e, a-favór, atu bele haruka fujitivu Arnolfo Teves Jr  fila bá iha nia rain Filipina. Tanba ita nia Konsitituisaun dehan katak, atu bá iha estradisaun tenke iha desizaun definitiva ida hosi tribunál,” Ministru Justisa (MJ), Sérgio Hornai, hatán bá Hatutan.com hafoin partisipa iha seremónia lansamentu Livru “The Sky is Ours”, iha Salaun Nobre, Ministériu Negósiu Estranjeiru no Kooperasaun (MNEK), Díli, Sesta (06/12/2024).

Governu Timor-Leste hein hela, no sei halo artikulasaun bá buat hothotu, depende bá iha desizaun tribunál hatete halo nusá, tanba nu’udár polítiku, nu’udár ministériu responsável, tuir lei ezekusaun penál nian, tuir lei kona-bá estradisaun nian, hirak ne’e hotu kabe bá iha ministériu justisa, atu haree, atu koordena atu bele halo prosekusaun bá iha estradisaun nian, mais, tenke fila-fali bá iha desizaun definitiva ida mai hosi Tribunál.

“Pozisaun governu nian, tenke obedese bá iha desizaun tribunál, haree bá iha sirkunstánsia hothotu, reúne katak, bainhira arguidu ida ka kondenadu ida, nia fila bá iha nia país oríjen ka fujitivu ida bá iha nia país oríjen, la fó nia efeitu bá iha pena  prizaun prepétua ka bá iha pena de morte,” Ministru  Sergio Hornai hateten.

“Ida-ne’e mak sai hanesan rekézitu úniku, ita labele iha tán sirkunstánsia seluk, tanba ita mós tenke iha respeitu bá iha buat ida prinsípiu resíprosidade, mézmu ita seidauk iha akordu estradisaun entre Timor-Leste ho país hanesan Filipina. Maibé, ita tenke pondera iha sirkunstánsias balu bá iha polítika kooperasaun, entre país rua, iha prinsípiu resíprosidade ninian,”  Sérgio Hornai hateten.

Pozisaun Advogadu Teves Jr

Iha Tersa, 11 fulan-Novembru 2024), Advogadu José Ximenes, ne’ebé fasilita asisténsia legal ba fujitivu Arnolfo Teves Jr, informa bá jornalista sira, katak tuir artigu 33, númeru 2, Konstituisaun RDTL, probidu halo estradisaun bá kualker sidadaun bainhira sidadaun refere iha ninia país orijen halo hela persegisaun polítika bá nia.

“Iha ne’e, ha’u hakarak esplika bá ita-boot sira katak, señor Teves Junior, persegidu iha ninia rain Filipina, governu Filipina halo persegisaun bá nia. Tanba saida, primeiru, tanba nia mak halo krítika maka’as bá governu atuál. Komu halo krítika maka’as kona-bá funu esterna, investimentu esterna ninian, ne’ebé foti hosi osan forsa sira nian, forsa armada Filipina no mós polísia sira, ne’ebé governu utiliza fali bá halo investimentu esternu, nia krítika maka’as ida ne’e, tanba futuru, forsa sira bele lakon sira-nian, bainhira investimentu sira ne’e laiha retornu. Entaun, nia krítika maka’as, ida ne’e mak persegi nia,” antigu Prokuradór Jerál Repúblika ne’e hateten.

Jornalista: Rogério Pereira Cárceres