Hatutan.com, (04 Dezembru 2024), Díli—Komisaun Anti-Korrupsaun (CAC, sigla portugés), Segunda liubá, haruka karta notifikasaun bá dirijente sira (kuaze maioria) iha Polísia Servisu Investigasaun Kriminál (PCIC) hodi presta deklarasaun kona-bá kazu abuzu podér,  pekulatu ba uzu, administrasaun de nosa, no tráfiku ba uzu.

Lee Mós: Diretór Nasionál PCIC Vicente e Brito Rekoñese Nia Oan-mane Uza Pistola Treinu Tiru

Edífisiu CAC iha Faról, Díli. Foto/Tome da Silva

Tuir notifikasaun CAC nian ne’ebé dirije ba dirijente sira PCIC nian ne’e hahú Tersa, Kuarta, Kinta to’o Sesta  (04-06/12/204), ba presta deklarasaun iha CAC tuir ida-idak nia tempu no ida-idak nia oras ne’ebé kontempladu iha karta notifikasaun nia laran.

Karta notifikasaun hanesan mós CAC haruka ba, Xefe Gabinete Inspesaun Disiplinár nu’udár mós Xefe Departamentu Armamentu no Seguransa PCIC, Octavio da Costa Araújo, ne’ebé daudaun ne’e kumpre hela suspensaun tinan ida.  

Informasaun ne’ebé Hatutan.com asesu hosi fonte importante balu husu atu la bele publika nia identidade, katak dezde Tersa  ne’e, dirijente sira PCIC nian ba ona presta deklarasaun iha CAC relativa ho kazu abuzu podér,  pekulatu ba uzu, administrasaun de nosa, no tráfiku ba uzu, ne’ebé durante ne’e deskonfia akontese iha PCIC.

Deskonfia notifikasaun CAC nian ba dirijente sira PCIC nian ne’e iha relasaun ho kazu  superiór balun PCIC nian  uza podér hodi asegura pesoál konfiansa balun iha PCIC fasilita fó treinu bá superiór PCIC  nia oan-mane utiliza arma servisu PCIC nian no bá pratika tiru iha karreira de tiru PCIC nian iha Kaitehu, Munisípiu Liquiça, iha (data la fiksa) fulan-Outubru tinan 2023.

Iha Tersa ne’e, Hatutan.com halo ona konfirmasaun direta ho Komisáriu CAC, Rui Pereira, iha nia gabinete, edifísiu CAC, Faról, Díli. Maibé nia parte seidauk bele fó komentáriu ka fó informasaun ba públiku liuhosi média tanba prosesu ne’e sei la’o hela no konsidera segredu justisa.

Molok ne’e, iha Tersa,  14 fulan-Maiu 2024, Diretór Nasionál PCIC, Vicente Fernandes e Brito, responde ba jornalista sira hateten no rekoñese fó pistóla bá oan-mane hodi treinu tiru hamutuk ho membru  PCIC sira iha área Kaitehu, Suku Tibar, Postu Administrativu Bazartete, Munisípiu Liquiça.

Haktuir bá dokumentu ne’ebé Hatutan.com asesu iha fulan-Outubru tinan 2023, hatudu katak irregularidade lubun, abuzu podér, inklui krime balun mak deskonfia  komete hosi superiór sira PCIC nian.

Dokumentu ne’e Investigadór Kriminál no Espesialista Laboratóriu PCIC sira dirije ona bá Primeiru-Ministru (PM) Xanana Gusmão ho nia koñesimentu bá  Vise-Primeiru-Ministru asuntu Dezenvolvimentu Rurál no Abitasaun Komunitária, Mariano “Assanami” Sabino Lopes, Ministru Prezidénsia Konsellu Ministru, Hermenegildo “Agio” Pereira, eis Ministru Justisa (Saudozu) Amândio de Sá Benevides, inklui Koordenadora bá Reforma Setór Justisa, Lúcia Lobato.

Haktuir hosi dokumentu ne’e katak, superiór balun PCIC nian, deskonfia  uza podér hodi assegura pesoál konfiansa balun iha PCIC fasilita fó treinu bá superiór PCIC  nia oan-mane utiliza arma servisu PCIC nian no bá pratika tiru iha karreira de tiru PCIC nian iha Kaitehu, Munisípiu Liquiça.

Diretór Nasionál PCIC, Vicente Fernandes e Brito dehan, treinamentu ida ne’e, sira realiza kada tinan, hala’o dala-rua. Iha tempu ne’ebá, sira konvida mós parte hosi Servisu Nasioná Intelijénsia (SNI) nian bá hotu.

“Ha’u nia oan mós iha ne’ebá hotu, ha’u nia oan dehan, Apa, ha’u hakarak bá rona kilat tarutu, tanba ha’u nunka rona. Entaun, nia bá, buat ne’e tarutu. Depois sira dada tiha nia bá iha ne’ebá, tiru tiha, tres metrus, mais, ho bala treinu,” Diretór Nacional PCIC, Vicente Fernandes e Brito, hateten bá jornalista sira hafoin seremónia aniversáriu estabelesimentu PCIC bá dala-10 ho tema “os ganhos e desafios” iha Salaun Multiusos, Bebora-Díli, Tersa (14/05/2024).

Vicente Fernandes e Brito dehan, partisipante iha treinamentu tiru anuál ne’e, la’os PCIC mesak, maibé, partisipa mós hosi eis vise-Ministru Justisa, José Edmundo Caetano, iha mandu VIII Governu Konstitusionál, juiz sira, prokuradór sira, atuál Ministru Justisa, Sergio Hornai, ne’ebé uluk sei hanesan Komisáriu iha Comissão Anti Corrupção (CAC).

“Mas, ami bolu bainaka. Ha’u nian, ha’u figura públika, diretór nasionál PCIC, ha’u nia oan. Sé momentu la tama reforma, ha’u nia oan, buat ne’e di’ak ka aman hela. Ha’u hatene sá, ha’u prokuradór ha’u nia feeling. Ita-boot (jornalista) sira ne’e, ha’u haree ida-idak ne’e ha’u hatene hotu kedas. Ha’u hatene, hosi ne’ebá ha’u hatene hotu. Tanba ha’u  iha informasaun ne’e kompletu iha ha’u nia liman,” Diretór Nasionál Vicente e Brito hateten.

Diretór Nasionál PCIC ne’e mós hatene, tanba kazu ne’e divulga dala-barak iha públiku, kona-bá nia oan-mane mós envolve tiru iha atividade treinamentu ne’ebé PCIC rasik mak oraganiza. Tuir nia, dala-ruma mós tanba públiku hanoin katak durante ne’e nia servisu iha PCIC ne’e mak nia oan tiru de’it. Laiha tán buat seluk. Maibé, diretór PCIC konsidera buat hirak ne’e hanesan pensamentu ida ne’ebé mak subjetiva. Biar nune’e, nia prontu iha kualker oras, atu ema lori nia bá Ministériu Públiku hodi presta nia deklarasaun hanesan arguido.

Jornalista: Rogério Pereira Cárceres