Hatutan.com  (21 Novembru 2024), Díli–Sorumutu  Konsellu Ministru, Kinta (21/11/2024), iha Palásiu Governu,  halo analiza proposta fó indultu husi Prezidente Repúblika iha ámbitu  selebrasaun loron Proklamasaun Independénsia Timor-Leste  ba da-49, 28 Novembru 2024.

Lee Mós: Xefe Estadu Sei Fó Indultu bá Prizioneiru Ne’ebé Komportamentu Di’ak no Kumpri Pena ho Lealdade

Eis Padre Richard Dasbach ne’ebé envolve iha kazu pedefilia hamutuk ho prizioneiru sira seluk iha Prizaun Becora, Díli. Foto/Espesiál

Bazeia ba Lei n. 20/2023 estabelese katak fó indultu ka komutasaun (hakmaan) ba pena sira hanesan intervensaun polítika no umanitária hosi Prezidente Repúblika iha ámbitu administrasaun justisa. Prosedimentu ida-ne’e fó dalan ba perdaun totál ka parsiál ba pena, substitui pena ho pena ida ne’ebé favoravel liu ka ninia atenuasaun (hamenus pena), sempre ho fundamentu no tuir kazu ida-idak.

Bazeia ba  artigu da-8 husi Lei ne’ebé temi ona, Governu halo ona konsulta kona-bá desizaun hirak-ne’e ho objetivu atu hasai opiniaun ida, maske ida-ne’e la’ós vinkulativu hodi respeita Prezidente Repúblika nia kompeténsia eskluziva.

Liga ho proposta fó indultu husi Prezidente Repúblika nian ne’ebé husu governu atu fó hanoin, Ministru Justisa Sergio Hornai hateten, Governu haree, tetu no konsidera ba iha lista  benefisiariu kuaze na’in-25  ne’ebe mak sei hetan direitu ba iha indultu no mos komutasaun ba pena.

“Hosi prizaun, ami eskolla idak-idak sira ne’ebé mak destaka sira hotu-hotu se sai, purvolta na’in-25 kompostu hosi na’in-10  sei hetan indultu   no na’in-15 sei hetan komutasaun ba pena,” Ministru Justisa, Sergio Hornai ba jornalista sira hafoin partisipa sorumutuk  Konsellu Ministru.

Sergio Hornai haktuir  kona-bá benefisiariu sira-nia aplikasaun ba iha komutasaun pena ne’e fo ona, balun  bele tinan-ida (1) fulan-neen (6),  balun sei hetan fulan-neen (6), no balun ne’ebe sujeita ba iha indultu nia sei hetan indultu parsial ka indultu total depende husi Prezidente Repúblika  nia desijaun rasik.

Prosedementu indultu  no mós komutasaun ba  pena nian konforme ba lei no 20/2023 ne’ebé koalia kona-bá prosedementu indultu no komutasaun pena ninian, no ninia lejitimidade mai husi kondenadu sira rasik, mai husi reprezentante no mós mai husi família ne’ebé bele husu ba iha Prezidente Repúblika, atu nune’e, bele uja nia kompetensia konstitusional politika iha admistrasaun justisa nian para atu bele konsede ka fó konsesaun indultu ba iha komutasaun pena ba iha kondenadu sira ne’ebe liu husi prosesu judisiáriu ida  ne’ebé iha ona desizaun defenitiva.

Bazeia ba artigu 85 Konstituisaun Repúblika Demokratika Timor-Leste ( K-RDTL) kona-bá kompeténsia hateten Prezidente Repúblika de’it mak sei hala’o knaar hirak ne’e: iha aliña I hateten  rona tuir governu atu fó perdaun ka hamenus kastigu.

Jornalista : Leopoldina de Carvalho