Hatutan.com, (30 Outubru 2024), Díli- Advogadu Privadu husi Fundasaun Lia-Loos, Marito da Silva Saldanha ho Domingos Belo Ximenes, Kuarta (30/10/23024), reprezenta sira-nia kliente Aleixo Cobra  hodi hato’o ona keixa bá Ministériu Públiku (MP) liga ho agresaun fíziku nee’ebé akontese iha kongresu estraordináriu Federasaun Futeból Timor-Leste (FFTL)  iha Novo Turismo, Díli.

Lee Mós: “Militar Invade” Kongresu Estraordináriu FFTL Hodi Hasai Aleixo Cobra

Forsa F-FDTL husi Unidade Polísia Militar lori sai Aleixo Cobra husi fatin kongresu estraórdinariu FFTL iha Novo Turismo, Sábadu (26/10/2024). Foto/Elio dos Santos da Costa

Kongresu Estraordináriu FFTL nian ne’ebé realiza iha Sábadu,  26 fulan-Outubru ne’e, Aliexo Cobra hanesan prezidente Asosiasaun Futebol Dili Leste hatán atuasaun militár husi membru FALINTIL-Forsa Defeza Timor-Leste (F-FDTL) husi Unidade Polísia Militár (PM) tanba hala’o orden husi Xefe Estadu Maiór F-FDTL, Tenente-Jenerál Falur Rate Laek nu’udár prezidente interinu FFTL.

Marito da Silva Saldanha ho Domingos Belo Ximenes  ne’ebé fasilita asisténsia legal bá sira-nia kliente Aleixo Cobra too iha Ministériu Públiku, hale’u tuku 09:45 ot, hodi rejistu sira-nia keixa iha Ministériu Públiku.

Advogado Marito da Silva Saldanha ba jornalista sira,  hatete nia parte lori ona keixa ba rejistu iha Ministériu Públiku no iha ne’ebá mak sira sei distribui bá prokuradór titulár ne’ebé sei kaer prosesu ne’e bá oin.

Nia afirma husi parte advogadu Fundasaun Lia-Loos reprezenta klienta hodi aprezenta prosesu ida-ne’e ba iha Ministériu Públiku no Prokuradoria ligadu bá kazu ne’ebé akontese iha loron 26 fulan-Outubru iha otel Novo Turismo, ligadu ho konferénsia ka kongressu extraordináriu FFTL nian ne’ebé dezintendimentu mosu no rezulta mós asaun krime.

“Keixa ne’e nia konteudu maka abuzu poder no agresaun fiziku, tamba ne’e keixa ne’e atu hasoru pesoal ka ajente sira ne’e sei iha segredu justisa, no orsida kuandu Ministériu Públiku haree bá dadus sira ne’e oinsá, bainhira iha ona notifikasaun mak ita foin bele indika dehan suspeitu mak ida ne’e, ka arguidu mak ida ne’e, no agora dadauk ne’e parte advogadu so aprezenta deit bá Ministériu Públiku,” Advogadu Marito da Costa Saldanha hateten.

Advogadu ne’e subliña liután katak keixa ida ne’e la’o tuir prosesu normal tamba viral tiha ona liu husi média sosiál no mós média nasionál sira, ho ida-ne’e maka parte vítima hamutuk ho advogadu aprezenta keixa ne’e ba Ministériu Públiku lao tuir dalan normal ne’ebé fó dalan bá iha Ministériu Públiku tuir artigu 48 Kódigu Prosesu Penal ne’ebé hateten nain ba asaun penal ne’e mak Ministériu Públiku.

Jornalista: Vito Salvadór