Hatutan.com, (21 Outubru 2024), Ermera– Foin-sa’e hamutuk 700  partisipa iha Permayouth Camp 2024  ho tema “Kuda Bee Hamoris Komunidade” aprende matéria temátiku lima hanesan Toos uma hun, Posu filtrasaun, Teras, Debu no ikus liu mak Satan kedalaman.

Foin-sa’e hamutuk 700 partisipa iha Permayouth Camp 2024 iha Railaco-Ermera, 21 Outubru 2024. Foto/Vito Salvadór

Prezidente Repúblika (PR), José Ramos-Horta iha nia diskursu abertura ba partisipante sira iha Aldeia Kaitarahei, Suku Fatukero, Postu Administrativu Railaco, Munisípiu Ermera, Segunda (21/10/2024), hateten udan bele mai iha fulan-Outubru ka bele mós iha fulan-Novembru, iha loron finadu ka ahi oan matebian nian, no bainhira bee laiha bele halo ema moras oin-oin, no iha mundu ne’e buat ida importante liu ba ema ida-idak mak bee, tamba laiha bee ema mate, animál mate, ai-horis sira mate no iha mundu sientista sira buka deskobre planeta oin-oin no úniku iha planeta rai ka terra ka mundu ida ne’e mak iha moris tamba iha bee.

Ramos-Horta afirma agora iha kampaña oin-oin kona-bá konserva bee, iha konferénsia internasionál oin-oin kona-bá bee, impaktu husi indústria sira ba bee, mosu veneno oin-oin iha bee tamba indústria, tamba ne’e problema bee no mudansa klimátika sai problema mundiál.

Ema hotu tenke kuda ai rihun ba rihun iha Timor laran tamba dezde uluk kedas ema tesi ai barak ona, halo rai manas no bee maran hotu. Tamba ne’e, Ramos-Horta hateten, solusaun mak ne’e hahú husi aldeia,  ba suku, sa’e ba Postu-Administrativu no too Munisípiu, lider sira Igreja hamutuk ho autoridade hotu-hotu mobiliza komunidade sira kuda ai-labele hein deit apóiu husi governu, maibé tenke hahú atu governu bele apoiu.

“Señór Ego Lemos nia organizasaun ne’e ezemplu di’ak ida. Nia la hein governu, nia la hetan ajuda barak husi governu. Ne’e dunik iha fatin ne’ebé bele kuda ai-fuan no kuda ai ba konserva bee, kuda halo barak ba. Ita hotu-hotu sei aprende husi akampamentu ida-ne’e, atu lori fali ba uma no aldeia ka komunidade ne’ebé imi hela ba oinsá kuda bee ba moris komunidade nian,” José Ramos-Horta tenik.

Ramos-Horta hatutan liután katak foin-sa’e sira ida-idak mak sei sai hanesan eroi foun ba komunidade atu oinsá konserva bee no kuda ai hosi rekupera hikas bee ne’ebé lakon tamba ema nia hahalok tesi no sobu duut arbiru.

Xefe Estadu mos elojia ho Ego Lemos nia kontribuisaun ba kuda bee liu husi programa Permayouth Camp kada tinan ne’ebé fó impaktu pozitivu no lori benefísiu direita ba komunidade sira.

National Parmayouth Camp 2024. Foto/ Vito Salvadór

Ego Lemos la’ós de’it hakerek múzika maibé mós hatudu nia asaun konkreta ba kuda bee ba komunidade sira hodi rekupera bee matan kuaze liu ona 300 ba komunidade sira.

Prezidente Autoridade Munisípiu Ermera, José Martinho dos Santos Soares hateten mudansa klimátika halo bee maran iha fatin hotu-hotu. Ermera iha tempu antigu foho lolon sira ne’e mesak nakonu ho bee de’it, mais ohin loron ho mudansa klimátika bee maran hotu, debu barak mak bee maran kuandu bailoron-naruk no bee matan balun bee laiha.

“Ha’u haree programa ida ne’e di’ak tebes-tebes atu ajuda ita nia komunidade hetan bee-moos sufisiente no evita tesi kanu bee-moos arbiru. Ha’u hein katak ho programa kuda bee ida ne’e sei tulun komunidade sira ne’ebé kuandu bailoron naruk susar hetan bee-moos bele hetan bee-moos sufisiente fila fali,” José Martinho dos Santos Soares.

Prezidente Autoridade ne’e mos parabeniza inisiativa Diretór ezekutivu  Permakultura Timor-Leste (PERMATIL), Ego Lemos ho nia ekipa, inklui komunidade no partisipante sira hotu-hotu iha Permayouth Camp 2024.

Diretór Ezekutivu PERMATIL Eugénio Lemos ne’ebé koñesidu ho Ego Lemos hateten partisipante hotu iha Permayouth Camp 2024 hanesan Embaixadór ba ida-idak nia komunidade no saida mak aprende iha akampamentu ida ne’e tenke lori fila fali ba implementa iha Komunidade sira.

“Problema mudansa klimátika laos buat ida ne’ebé sei dok mais buat ida ne’ebé iha hela ita hotu nia matan laran no ita hotu presija iha asaun atu prevene,” Ego Lemos hateten.

Múziku Timoroan ne’e subliña liután katak bainhira hotu-hotu iha vontade no iha asaun barak ba prevensaun mudansa klimátika, hanoin katak iha tinan hirak mai oin sei iha mudansa signifikativu.

Iha tinan ida-ne’e, PERMATIL realiza akampamentu nivel nasionál nian ba dala-VI ho tema Kuda Bee Hamoris Komunidade ne’ebé hetan partisipasaun máximu husi komunidade liu-liu foin-sa’e sira husi munisípiu 12 hamutuk ho RAEOA no Ataúro inklui partisipante nain lima husi Indonézia, Nusa Tenggara Timur (NTT) no observadór balun husi estudante universitáriu sira husi Austrália.

Jornalista: Vito Salvadór