Hatutan.com, ( 14 Outubru 2024), Díli—Komunidade média Timor Leste sei komemora sira-nia loron nasionál liberdade imprensa iha loron 16 fulan-Outubru 2024.

Lee Mós: 16 Outubru Loron Nasionál Liberdade Imprensa, Jornalísta Labele Ta’uk Fó-Sai Lia-loos!

Jornalista Timoroan sira mai hosi média nasionál sira iha Timor-Leste (TL), partisipa formasaun kona-bá Jornalizmu bá pás ne’ebé oferese hosi Conselho Imprensa (CI), iha edifisiu CI Kintal Boot, sesta (21/06/2024). Foto/Dok. Lázaro Pereira Quefi.

Komemorasaun loron nasionál liberdade imprensa ne’e  tinan ne’e konsentra iha Postu Administrativu Balibo, Munisípiu Bobonaro, ho tema sentrál “Atmosfera Liberdade Imprensa iha Nasaun Demokrátiku”.

Relasiona ho komemorasaun loron nasionál liberdade imprensa ne’e, membru Parlamentu Nasionál sira husu no enkoraja jornalista sira atu labele ta’uk denunsia lia-loos.

Membru PN husi Bankada FRETILIN,  Antoninho Bianco, Segunda (14/10/2024),  hateten, bazeia ba nia observasaun kona-bá servisu jornalista sira-nian durante ne’e  kuaze la’o diak, maske Governu liu husi Sekretáriu Estadu Komunikasaun Sosiál (SEKOMS) tenta fó subsídiu “indireta”  ba mídia  sira, maibé jornalista sira kontinua hala’o nia servisu kontrolu sosiál hodi denunsia lia-loos.

“Jornalista sira aten brani para atu haklaken lia-loos, liu-liu informasaun loos. Buat ne’ebé loos, loos, buat ne’ebé laloos, laloos. Maske Governu tenta fó osan husi parte  ida ne’e,  labele haluha aspirasaun    povu mak importante atu hato’o,” Deputadu Antoninho Bianco  hateten iha Parlamentu Nasionál.

Membru PN husi opozisaun ne’e apresia ho mídia no jornalista sira ne’ebé ho kbiit-rasik haklaken informasaun ba povu, sai aspirasaun povu, hodi haklaken mos polítiku sira-nia aspirasaun ba povu ho  loloos.

“Ha’u hanoin liberdade imprensa ne’e importante  ema idak-idak iha devér ho direitu atu haklaken buat ne’ebe loos no lalika ta’uk, ema kuandu ta’uk atu haklaken lia-loos ne’e sala bo’ot,” Deputadu Antoninho Binaco hateten.

Iha fatin hanesan membru PN husi  Bankada  CNRT, Patrocínio Fernandez hateten, komemorasaun loron nasional liberdade impensa ne’e hanesan loron reflesaun, katak jornalista sira alende jornalista maibé sira mós nu’udar sidadaun timor ba rai ida-ne’e no  mós pertense ba estadu ida-ne’e.

“Oinsá mak kontribui ba nasaun ida ne’ eliu husi profisaun jornalista, lori informasaun ne’ebe kredivel, informasaun ida ne’ebe iha valór, edukativu ba ita-nia povu hodi ajuda loke ita-nia nia pensamentu kritika, bele kontrola it- nia sistema boa-governasaun,” Deputadu PPatrocínio Fernandez hateten.

Nia mós husu ba jornalista sira katak la’ós de’it kapasita an iha profisaun hanesan jornalista, maibé forma mós sentidu pertense hanesan sidadaun Timor.

Jornalista : Leopoldina de Carvalho