Hatutan.com, (08 Outubru 2024), Díli- Governu Timor-Leste liu husi Sekretáriu Estadu Formasaun Profisionál no Empregu (SEFOPE),  Tersa (08/10/2024), asina memorandu entendimentu bá kooperasaun  ka   Memorandum of Cooperation (MoC) hodi formaliza akordu mobilidade laborál ho Governu Japaun.

Sekretáriu Estadu Formasaun Profisionál no Empregu (SEFOPO), Rogério Araújo Mendonça ho Embaixadór Japaun mai Timor-Leste, Tetsuya Kimura asina memorandu entendimentu bá kooperasaun iha MNEK, Díli, Tersa (08/10/2024). Foto/Tome da Silva

Sekretáriu Estadu Formasaun Profisionál no Empregu (SEFOPO), Rogério Araújo Mendonça ba jornalista sira iha salaun MNEK, Praia dos Coqueiros, Díli, Tersa (08/10/2024) hateten  akordu mobilidade laborál ida-ne’e hanesan kontinuasaun hosi programa sira tinan kotuk nian iha ne’ebé Timor-Leste ho Japaun halo akordu Memorandum of Cooperation (MoC) hodi haruka traballadór Timoroan sira ba servisu iha Japaun.

Akordu mobilidade laborál ka MoC ne’ebé asina entre Timor-Leste ho Japaun ne’e ho nia konteúdu treinamentu ba Timor-Leste sira, maibé iha pratika implementasaun hanesan ho akordu laborál sira seluk iha ne’ebé timoroan sira sei hetan oportunidade atu ba servisu no aumenta abilidade ba sira nia an no bele sai hanesan bukae ida bainhira fila mai no implementa iha Timor-Leste.

“Iha MoC ne’ebé ita selebra ne’e nia konteúdu ne’e hateten katak ba treinamentu, maibé ita-nia joven sira ne’ebé ba iha ne’ebá ne’e sei hetan mos kontratu laborál hanesan ho Timoroan sira seluk iha Austrália no Koreia du Súl nian, tamba ne’e sira ba ne’e ba servisu no sei hetan mós formasaun atu aumenta sira nia abilidade,” Rogério Araújo Mendonça hateten.

Dezde tinan 2023, Timor-Leste haruka ona Timoroan hamutuk 19 ne’ebé oras ne’e ba servisu iha Japaun iha área Agrikultura hamutuk 17 no rua seluk iha area indústria.

Ba oin SEFOPE óos iha ona planu atu prepara tan Timoroan ho kuantidade boot atu ba servisu iha Japaun tuir akordu MoC ne’ebé iha nune’e hahú loke sentru formasaun lian Japaun iha sentru formasaun SENAI Becora no sei haluan tan kooperasaun ho ajénsia JICA iha Timor-Leste hodi fó treinamentu ba Timoroan sira ne’ebé iha saúde di’ak no mentalidade preparadu para ba servisu iha Japaun.

Akordu MoC ne’e ho durasaun kontratu ba traballadór Timoroan sira hamutuk tinan haat no iha posibilidade renova depende ba empreza sira ne’ebé fo servisu iha Japaun.

Akordu MoC ne’e bele realiza no iha mós assnatura ba akordu mobilidade laborál ida ne’e tamba hetan esforsu makas husi embaixadór Timor-Leste ba Japaun, Ilídio Ximenes ne’ebé halo esforsu servisu hamutuk ho Ministériu Negósiu Estranjeiru no Kooperasaun Timor-Leste (MNEK-TL) no Embaixadór Japaun mai Timor-Leste.

Embaixadór Japaun mai Timor-Leste, Tetsuya Kimura hateten MoC ne’e atu fasilita Timoroan sira ba servisu iha Japaun no ida-ne’e mós atu hametin liután kooperasaun bilaterál entre país rua.

“Japaun hahú tiha ona kooperasaun ho Timor-Leste, no liu husi asinatura ba MoC ne’e bele aselera liután akordu kooperasaun sira ba iha futuru no daudaun ne’e iha ona kooperasaun iha área Agrikultura, Indústria inklui manufatura no sei iha tan kooperasaun iha área sira seluk iha futuru.

Diplomata Japonês ne’e hatutan iha munisípiu lubuk ida iha Japaun ne’ebé hakarak fó servisu ba Timoroan sira tamba ne’e ba oin sei bele iha oportunidade barak liután ba Timoroan sira hodi bele ba servisu iha Japaun ho MoC ne’ebé formaliza ohin.

Jornalista: Vito Salvadór