Hatutan.com, (12 Jullu 2024), Díli- Prezidente Repúblika (PR), José Ramos-Horta, hateten Governu tenke tane aas empreza Aero Dili no la nesesita atu aviaun AirAsia husi Indonézia semo ho rute hanesan husi Denpasar-Indonézia mai Díli-Timor Leste no Díli bá Denpasar.

Lee Mós: Governu Autoriza AirAsia-Indonézia, Aero Dili Hapara Operasaun

Prezidente Repúblika, José Ramos-Horta akompaña husi Vise-PM Francisco Kalbuadi Lay iha konférensia imprensa iha sala VIP Aeroportu Internasionál Prezidente Nicolau Lobato, Sesta (12/07/2024). Foto/Vito Salvadór

Prezidente Repúblika José Ramos-Horta hateten Airlines Businesses ne’e komplexu no difisil, ne’e iha mundu tomak, iha rai sira ne’ebé Airlines Businesses susesu boot ne’e kuandu hahú Governu tau orsamentu boot no garante nia sustentabilidade tamba dalaruma Governu tau osan boot mós la aguenta.

Ramos-Horta haktuir ho esperiénsia hanesan iha Afrika no West Africa sira iha Airlines ho naran East Africa Airlines, maibé mate tamba dalaruma laiha kompetisaun ne’ebé moos.

“Nédunik Governu mak tenke haree oinsá tane makas Aero Díli, tanba Jet Fuel ne’ebé tau ba aviaun ne’e karun, iha Timor nia folin boot liu ka karun liu, dupla husi folin iha Singapura, Bali no Kuala Lumpur,” Prezidente Repúblika José Ramos-Horta hateten bá jornalista sira iha Aeroportu Internasionál Prezidente Nicolau Lobato, Comoro, Sesta (12/07/2024).

“Empreza sira mai Timor la selu Air space, ita selu kuandu ita tama ona Air space Indonézia nian tanba ita seidauk iha tratadu internasionál tamba ne’e iha buat oin-oin ne’ebé Governu tenke haree, bele husik Airlines seluk mai, maibé Governu tenke haree para nivel kompetisaun ne’e di’ak, selae Timor nian iha kraik sira iha leten fali,” Xefe Estadu RDTL ne’e afirma.

“Ha’u nia advise bá Governu, sé AirAsia mai para atu halo de’it rute Dili ba Denpasar no Denpasar mai Dili, ladún interese ba ita, la iha nesesidade, se AirAsia atu halo karik rute Dili bá Malázia ka  Dili bá Singapura no Dili bá Beijing, entaun ne’e di’ak, mais halo rute Denpasar mai Dili ha’u haree ba Timor laiha interese bá ida-ne’e,” Ramos-Horta subliña.

Ramos-Horta afirma tan situasaun Airlines Businesses ne’ebé Timor-Leste iha la nesesidade atu iha tan airlines seluk ne’ebé mai ho rute Denpasar mai Dili no Dili bá Denpasar.

Fó hanoin fila-fali katak iha Segunda (08/07/2024), empreza AirAsia husi Indonézia liuhosi Xefe Rede no Autoridade Aeroportu nian  Head network and airport authority), Edwin ho delegasaun hamutuk na’in-neen (6) hasoru-malu ona ho Primeiru-Ministru (PM) Kay Rala Xanana Gusmão, informa kona-bá sira-nia planu bá aviaun AirAsia ne’ebé sei hala’o mós voo mai Timor-Leste iha inísiu fulan-Setembru 2024.

Maske nune’e, Ministru Transporte no Komunikasaun (MTK), Miguel Marques Manitelu rasik, konfirma ona katak Governu Timor-Leste seidauk admite operasaun aviaun komersiál AirAsia Indonézia mai Timor-Leste.

“Governu sidauk admite, imi dehan admite,” Ministro Miguel Marques Manitelu hateten hodi responde Hatutan.com bainhira akompaña Primeiru-Ministru (PM), Kay Rala Xanana Gusmão  halo observasaun bá arredores Portu Díli, Kuarta ( 10 /07/2024).  

Jornalista: Vito Salvadór