Hatutan.com, (10 Jullu 2024), Díli–Prezidenti Komisaun D Parlamantu Nasionál  ne’ebé tau matan bá asuntu Ekonomia no Dezemvolvimentu, Ricardo Baptista, husu atu Governu tau prioridade bá investor sira Timoroan ne’ebé ho kbiit rasik no limitasaun oioin, inisia investimentu boot iha área aéreu.

Lee Mós: Molok Legaliza Operasaun AirAsia, Governu Presiza Haree Rekizitu Air Agreement Service Indonézia ho Timor-Leste

Ekipa AirAsia husi Indonézia hasoru malu ho PM Xanana Gusmão iha Pálasiu Governu, Segunda (08/07/2024). Foto/Mídia GPM

Deputadu Ricardo Baptista,  hateten Governu bele fasilita atu investor internasionál sira mai investe iha Timor-Leste iha área oioin, hanesan AirAsia husi Indonézia atu halo operasaun aéreu ho rute Denpasar-Dili, hanesan mós ho Aero Dili no Citilink hodi bele iha kompetisaun, maibé presiza tau prioridade bá Aero Dili, empreza Timoroan nian ne’ebé ho kbiit rasik investe hodi lori bandeira Timor-Leste nian semo bá nasaun oioin.

“Ida-ne’e nu’udár oportunidade ida, AirAsia husi Indonézia bele mai tán i bele fasilita ita nian turista sira viajen husi Timor nian bá rai li’ur inklui husi estranjeiru mai Timor. Ligá bá ninian desvantajen mak dalaruma ho prezensa AirAsia bele fó impaktu bá ita setór privadu sira ne’ebé mak oras ne’e daudaun hala’o hela atividade iha ida-ne’e, hanesan Aero Dili ne’ebé halo investimentu boot la’ós de’it husi aspeitu sosa aviaun rasik, maibé Aero Dili fó oportunidade formasaun iha area politu nian bá timoroan, aeromosa Timoroan no fasilita formasaun mekániku aviaun nian bá timoroan iha empreza internasionál Airbus,”  Deputadu Ricardo Baptista  hateten bá jornalista iha PN, Kuarta (10/07/2024).

Tuir nia katák Timor-Leste  foin iha aviaun ne’ebé ho Bandeira rasik mak Aero Dili no  ezistensia Citilink ne’ebé mak servisu hamutuk ho Timoroan lubuk ida ne’ebé mak halo atividade transporte aéreu husi Dilí bá Bali no mós bá fatin seluk.

Kona-bá AirAsia atu halo operasaun hanesan mós Citilink no Aero Dili ho rute Dili-Denpasar-Indonézia, tuir Deputadu Ricardo Baptista, bele fasilita tikete baratu, maibé tenke haree mós ho nia konsekuénsia bá inisiativa investimentu ne’ebé Timoroan halo ona atu labele prejudika Timoroan nia vontade investimentu iha área ne’ebé la’ós fasil,  

Deputadu Ricardo Baptista husu  Governu tenke apoiu emprezáriu Nasionál no oinsá mak Governu bele haree hodi garante emprezáriu nasionál sira nian ezisténsia para oinsá setór privadu sira iha Timor-Leste labele senti katák sira tersingkir  ho prezensa kompñia internasionál sira.

Iha fatin hanesan Deputada Bankada CNRT Cedelizia Faria dos Santos haktuir bainhira kompañia ida de’it mak halo operasaun mak bele dehan mosu monopolio, no nia bele halimar presu  bele hatuun hasa’e presu tuir hakarak tanba laiha kompetisaun. Maibé, sé iha tán kompañia seluk mak mai ida-n’e iha impaktu di’ak no ladi’ak, nia di’ak mak  minimiza monopoliu no bele iha kompetisaun iha presu no service.

“Agora ita ko’alia kona-bá emprezáriu nasionál klaru katák nia iha nia impaktu tanba ita mós hakarak promove ita-nia Timoroan para bá oin karik sira mós bele hatama tán aviaun seluk,” Deputada Cedelizia Faria dos Santos hateten.

Nia mós akresenta tán katák  hatama tán kompañia internasionál klaru katák orsamentu sei halai bá ema nian rai no la sirkula iha rai laran, no halo emprezáriu nasionál  sira senti katák Governu la proteje sira, maibé Governu mós tenke iha estratézia hodi tau prioridade bá Timor nian aviaun .

“Governu tenki tau matan bá emprezariu nasionál sira para bele motiva nafatin sira la’ós área aviaun  nian de’it, maibé bele mosu tán fali setór privadu sira iha área sira seluk ka bele mós iha fabrika bo’ot sira,” Nia afirma.

Jornalista Estájiaria : Zita Menezes