Hatutan.com, (08 Jullu 2024), Díli—Komisáriu Comissão Anti-Corrupção (CAC), Rui Pereira hahú servisu loron da-huluk no promete atu hadi’a uluk uma laran tanba buat barak mak la funsiona kleur ona, hafoin bele halo fali buat sira seluk liuliu bá investigasaun sira.

Komisáriu CAC, Rui Pereira hala’o enkontru dahuluk ho funsionáriu sira iha loron dahuluk, segunda (08/07/2024). Foto: Lázaro Pereira Quefi.

Tuir observasaun Hatutan.com, Rui Pereira hahú tama servisu loron primeiru iha tuku 8:00 otl, komprimenta funsionáriu sira, konversa halimar iha minutu balun. Tanba ne’e komisariu hakat Tama ba nia fatin hodi rai nia sasan servisu ninian ho flexibildade.

Lee Mós: Rui Pereira Simu Pose Nu’udár Komisáriu CAC Períudu 2024-2028

Iha loron dahuluk ne’e hala’o uluk enkontru servisu na’in sira iha ne’e, depois sei halo vizita bá iha diresaun prevensaun CAC nian iha Obrigado Barak nian no mós diresaun Finansas nian besik Sekretáriu Estadu Arte Kultura iha Praia dos Coqueiros.

Komisariu esplika bá Hatutan.com katak, CAC iha rasik ninia atividade prinsipál ladún la’o ho di’ak kleur ona tanba atividade atu lao presiza osan, tanba ne’e komisáriu la iha kleur ona osan $0,25  de’it mós la sai.

“Hafoin simu pose iha loron 05 Jullu foin daudauk nu’udár komisáriu, mai iha ne’e trata lai uma laran, hotu tiha mak foin trata tán asuntu sira seluk,” Rui Pereira hateten, iha edifísiu CAC, segunda  (08/07/2024).

Tuir planu, iha fulan dahuluk, komisáriu CAC sei haree foka bá uma laran bainhira hadi’a ona uma laran maka Adjuntu sira sei mai hodi ajuda servisu komisáriu nian.

Nia esplika, servisu prinsipál komisáriu nian mak sei haree lai sistema, buat hotu-hotu di’ak hela no halo moris fali de’it espesialmente atu asina atu osan sai mós presiza komisáriu ho diretér jerál sira no mós diretór finansas sira iha mak CAC bele funsiona ho di’ak.

Jornalista Estajiáriu: Lázaro Pereira Quefi