Hatutan.com, (02 Jullu 2024), Díli- Prezidente Repúblika (PR), José Ramos-Horta, halo vizita ofisiál ba Repúblika Mozambique ho Repúblika Angola hodi hametin relasaun diplomátika, promove kooperasaun, no hametin relasaun bilaterál ho nasaun Luzófonu sira.

Lee Mós: Ramos-Horta Hala’o Vizita Ofissiál bá Emiradus Árabes Unidus no Partisipa Simeira ASEAN-GCC

Prezudente Repúblika, José Ramos-Horta. Foto/Elio dos Santos da Costa

Komunikadu ba Imprensa ne’ebé Hatutan.com asesu husi Gabinete Média Palásiu Prezidensiál Nicolau Lobato, Tersa (02/07/2024) relata, vizita ofisiál Xefe Estadu nian ba iha nasaun Repúblika Mozambique no Repúblika Angola ne’e hahú husi loron 03 to’o loron 10 fulan-Jullu, tinan ne’e.

Iha Repúblika Mozambique Xefe Estadu sei hahú nia vizita ofisiál husi loron 03 to’o loron 07 fulan-Jullu, iha ne’ebá Prezidente Repúblika José Ramos-Horta sei hasoru malu ho nia omólogu Prezidente Mozambique, Filipe Jacinto Nyusi.

Prezidente Repúblika José Ramos-Horta mós sei partisipa iha sorumutuk bilaterál sira, tuir mai ho asinatura akordu sira, no konferénsia imprensa konjunta ho Prezidente Nyusi.

“Prezidente Repúblika José Ramos-Horta nia programa iha Mozambique sei inklui mós tau koroa ai-funan iha Prasa Erói nian, simu Xave Sidade Maputo nian, hasoru ho Prezidente Asembleia Repúblika Mozambique nian, Esperança Bias, atende Banquete Estadu iha Palásiu Ponta Vermelha, fó palestra iha Universidade Eduardo Mondlane kona-ba “Timor-Leste, Rejiaun no Mundu, no vizita Sentru Análize Estratéjika CPLP nian,” Hatutan.com sita komunikadu.

Prezidente Repúblika José Ramos-Horta sei kontinua vizita estadu ba Luanda, Angola, husi loron 08 to’o loron 10 Fulan-Jullu 2024. Iha Angola Xefe Estadu sei partisipa iha serimónia estadu, halo enkontru bilateral no hasoru malu ho Prezidente Angola, João Lourenço.

Prezidente Repúblika José Ramos-Horta sei hasoru mós ho Vise-Prezidente Angola, Esperança da Costa, no Prezidente Asembleia Nasionál, Carolina Cerqueira. Prezidente sei fó palestra ida iha Akademia Diplomátika Venâncio de Moura, vizita Akademia Polísia, no atende serimónia ida iha fasilidade foun Embaixada RDTL nian iha Angola.

Vizita estadu sira ne’e hatudu Timor-Leste nia kompromisu atu haforsa relasaun internasionál no haburas kooperasaun iha Komunidade Nasaun Lian Portugués nian, ka CPLP.

Iha Repúblika Mozambique no Repúblika Angola Prezidente Repúblika sei halo diskusaun produtivu ho nia omólogu sira kona-ba interese komún, inklui kooperasaun ekonómika, interkambiu kultural, no seguransa rejionál.

Timor-Leste nia relasaun Repúblika Mozambique no Repúblika Angola metin iha istória komún hanesan antigas kolónias Portugésa no membru CPLP. Vizita hirak-ne’e reprezenta pasu signifikativu ida atu haforsa ligasaun no esplora dalan foun sira ba kolaborasaun.

Jornalista: Vito Salvadór