Hatutan.com, (26 Juñu 2024), Díli- Ministru Negósiu Estranjeiru no Kooperasaun (MNEK) Timor-Leste, Bendito dos Santos Freitas, ofisiálmente formaliza  Akordu Servisu Aero ho Ministru Transporte Malázia, YB Loke Siew Fook, kona-ba koletividade transporte aéreu entre Timor-Leste ho Malázia.

Lee Mós: TL-Malázia Sei Asina Akordu Formál iha Aero

MNEK Bendito dos Santos Freitas ho Ministru Transporte Malázia, YB Loke Siew Fook, asina akordu kona-ba konektividade transporte aero. Foto/Media MNEK.

Komunikadu imprensa ne’ebé Hatutan.com asesu husi Gabinete Média MNEK, Kuarta (26/06/2024) informa, Akordu Air Service Agreement (ASA) entre Timor-Leste ho Malázia ne’e, Ministru Negósiu Estranjeiru no Kooperasaun, Bendito dos Santos Freitas, asina reprezenta Ministru Transporte Komunikasaun, Miguel Marques Manitelu.

“Ita hein katak, parte téknika sira bele kontaktu malu hodi haree preparativus oinsá mak ba futuru bele iha ona vou aviaun husi Malázia ba Timor-Leste, nune’e mós posibilidade Timor nia aviaun bele tama mai Malázia,” MNEK Bendito dos Santos Freitas hateten.

Akordu ASA ne’e importante tebes, no apoiu ona Timor-Leste nia dezenvolvimentu iha setór konektividade aero nian, nune’e sira prontu atu fahe esperiénsia no teknolojia ba kapasitasaun umanus ba liu-liu ba tékniku sira-ne’ebé servisu iha área aviasaun nian.

Ministru Transporte Malázia mós apoiu Tmor-Leste nia dezenvolvimentu ba setór konektividade aero nian, no prontu mós atu bele partilla sira-nia esperiénsia no teknolojia ba kapasitasaun rekursu umanus liu-liu ba sira-ne’ebé servisu iha área aviasaun nian.

Partisipa iha serimónia asinatura akordu ASA ne’e, Enkarregada Negósiu Embaixada Timor-Leste ba Malázia, Adelina Martins, Prezidente Autoridade Aviasaun Sivíl Timor-Leste no seluk tan.

Jornalista: Vito Salvadór