Hatutan.com, (24 Juñu 2024), Díli- Timor-Leste ho Indonézia kontinua diskute servisu hamutuk no hametin kooperasaun bilaterál iha setór ekonómiku hodi tulun dezenvolvimentu nasionál iha país ne’e.

Lee Mós: Indonézia Oferese Bolsu Estudu bá Timoroan 200

Embaixadór Republika Indonézia, Octo Dorinus Manik hasoru malu ho Vise-PM Francisco Kalbuadi Lay, Segunda (24/06/2024). Foto/Elio. dos Santos da Costa

Embaixadór Republika Indonésia mai Timor-Leste, Octo Dorinus Manik, Segunda (24/06/2024), hasoru malu ho Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay, hodi fahe ba malu kona-ba dezenvolvimentu ekonomia iha Timor-Leste.

“Ami hakle’an liután diskusaun kona-bá kooperasaun bilaterál entre Timor-Leste no Indonézia, nu’udár meiu atu fortifika servisu hamutuk sira ne’ebé foku ba setór ekonómiku, ho área oin-oin, iha Turizmu, Agrikultura, noáarea pertinente sira seluk hodi apoiu dezenvolvimentu iha Timor-Leste,” Embaixadór Octo Dorinus Manik ba jornalista sira iha edifísiu Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Farol, Díli.

Nia hatutan Timor-Leste no Indonézia servisu makas hela iha prosesu elaborasaun ba akordu Bilateral investment Treaties ka Tratadu Investimentu Bilaterál ne’ebé ko’alia kona-bá akordu protesaun ba investimentu ne’ebé ba oin tenke lao tuir Road Maps ne’ebé sei halo.

Iha sorumutuk ne’e ko’alia mós kona-bá apóiu Indonézia nian ba Timor-Leste iha setór laboratoriu ba Servisu Quarentena no AIFAESA liu-liu ba teste produtu importadu sira ne’ebé sei kontinua no iha hela faze diskusaun ho ekipa tékniku husi Ministériu Koordenadór Asuntu Ekonómiku nian hodi bele hasae kapasidade no atendimentu servisu públiku iha Timor-Leste.

Diretór Jerál ASEAN Sei Vizita Timor-Leste

Embaixadór Republik Indonesia, Octo Dorinus Manik, informa n iha tinan ne’e Timor-Leste sei hetan mos vizita husi Diretór Jerál ASEAN hodi hare preparasaun no diskute servisu hamutuk sira ba Timor-Leste nia adezaun ba ASEAN.

Diplomata ne’e subliña mós katak Timor-Leste no Indonézia hanesan família tamba ne’e nafatin hametin kooperasaun no apoiu malu iha seitór hotu-hotu ba dezenvolvimentu nasionál.

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay hato’o mós nia apresiasaun ba apoiu no inisiativa sira ne’ebé Indonézia halo hodi apoiu dezenvolvimentu ekonómiku iha Timor-Leste.

Jornalista: Vito Salvadór