Hatutan.com, (07 Juñu 2024), Díli—Sarani Katólika iha mundu, inklui Timor-Leste, Sesta (07/06/2024), selebra festa  solenidade Kristu ka  selebra Jesus Kristu Nia Futar Fuan Santu ne’ebé fó an bá mate iha krus hodi soi ema hotu no kasu  ema nia sala sira.

Imajen Sagradu Kurasaun Jesus.

Padre selebrante misa solenidade Kristu ne’ebé hala’o Igreja Katedrál Imakulada Konseisaun, Díli, Paulos Maia iha nia omilia, hateten Jesus hanorin iha Nia ai-knanoik  dehan laiha domin ida ne’ebé bo’ot liu ema ida ne’ebe fó nia aan tomak ba nia belun seluk.

“Ita hanoin mós se iha tempu kuaresma, aiknanoik ida kona-bá oan-mane ida ne’ebe lakon (filho prodigo) oan ne’ebe la’o lakon hodi estraga buat hotu-hotu, moris a’at maibé fila mai, aman ida ne’e ho nia laran luak simu nafatin nia. Sinal domin ne’ebe  bo’ot bainhira Jesus hatudu mak iha krus tutun molok atu mate, nia sei reza,hodi harohan ba Maromak fó predua ba ema sala nain sira,” Pároku  Katedrál Imakulada Konseisaun ne’e haktuir.  

Nia fó sasin Maromak fó ba ema  ho prezensa Jesus Kristu no domin ida ne’e nia topu lolos mak Jesus Kristu Nia mate  atu soi ema hosi sala, husi nakukun no husi atan.

“Maluk sira, ita, ohin, selebra solinidade  Kristu Nia Futar Fuan Santu, fuan ne’ebe hatudu ba ita, fuan ne’ebé laiha kondisaun no ho domin ne’ebé ita labele kompara ho domin sira seluk ne’ebe ita simu. Domin ne’ebé lolos domin Maromak Nian ba ita ema, ne’e domin ida ne’ebé inkondisional, katak la tau rekizitu ida ba ita atu nia hadomi,” Pe. Paulos Maia hateten.

Tuir nia, Jesus la dehan you ka o  ne’e se? you ka o mai husi ne’ebe? no o nia moris oinsa? domin ida ne’ebé kompletu tebetebes, nakonu tebetebes no la iha diskriminasaun, no domin ida ne’e mak Jesus hatudu nafatin mai ema hotu liuliu bá família kaben nain sira, hadomi imi-nia parseiru sira kuda kontente iha familia nia laran hanesan Jesus Nia Futar Fuan Santu hatudu ba ema hotu.

Iha sorin seluk, Abreu Ximenes Correia nu’udár grupo kategoriais hateten katak  sarani ida ho festa solenidade  Kristu ne’e fo hanoin mai atu selebra Nai Jesus Nia futar fuan Santu ne’ebe mak sakrifika nia an tomak mai salva ema ho  domin.

Jornalista Estajiaria:  Isabel Pirres