Hatutan.com, (04 Juñu 2024), Díli-Polísia Judisiariu (PJ) husi Leiria seidauk identifika loloos motivu husi violénsia ne’ebé akontese iha Domingu (02/06/2024),  oras Portugál iha Fátima-Portugál ne’ebé rezulta mate ida, kanek todan tolu no kanek kaman rua.

Lee Mós: Autoridade Seguransa Sei Blokeia Traballadór Hosi Ajénsia Ilegál

Konfrontu iha estrada sira iha área Fátima-Portugal ne’ebé envolve rival Timoroan, Domingu (02/06/2024), oras Portugál. Foto/D.R

“Ami sei iha serbisu barak atu halo, asegura ona JN,” Diretór PJ dé Leiria, Avelino Lima hateten. Prezidente da Junta de Freguesia de Fátima, Humberto Silva, fó ona avizu ba autoridade sira katak konflitu sira-ne’e bele akontese fali, hanesan akontese dala rua, maske la’ós ho gravidade ida-ne’e, tanba iha rivalidade entre joven timoroan sira.

Polísia Judisiáriu Leiria halo investigasaun kona-ba konflitu sira ne’ebé akontese besik kuartél Voluntáriu Bombeiru iha  Fátima ne’ebé rezulta ema ida mate. Informasaun ne’e fornese husi Jornál dé Noticias no konfirma ohin dadeer husi CNN Portugal.  

Husi Polísia Judisiáriu  Leiria ba CNN Portugal hateten “situasaun ne’ebé konfuzaun tebes, ho ema mate ida no kanek lima,” sira hotu identifika tiha ona. Agora, “la iha kapturasaun” no kazu ne’e sei investiga hela.

 Tuir JN, vítima fatál ne’e mane ho idade tinan 25 no konflitu ne’ebé sidadaun Timoroan sira halo ho idade entre tinan 20 to’o 30, no motivasaun ba akontesimentu ne’e seidauk hatene, hanesan esplika husi fonte PJ.

Husi sorin seluk Embaixada Timor-Leste nian iha Portugal ho Autoridade Seguransa Portugeza, dadaun ne’e hala’o hela esforsu ida oinsá mak bele resolve konfrontu entre rivalidade  joven Timoroan sira iha Portugál ne’e.

Haktuir iha karta komunikadu hosi Gabinéte Média Ministériu Negósiu Estranjeiru  nian ne’ebé Hatutan.com asesu iha Tersa (04/06/2024), haktuir, Ministru Negósiu Estranjeiru no Kooperasaun (MNEK), Bendito dos Santos Freitas, orienta ona Embaixadór Timor-Leste iha Portugál atu urjentemente buka mekanizmu hodi fó solusaun ba kazu konfrontu entre joven sira iha Portugál.

“Preukupasaun ne’ebé Membru Parlamentár sira foti kona-bá akontesimentu konfrontu trájiku entre Timoroan sira iha Portugal, MNEK halo ona xamada para halo koordenasaun urjente ho Embaixadora Timor nian iha Lisboa, atu bele haree situasaun ida-ne’e. Prosesu la’o hela, ita nia Embaixada ho Polísia Judisiáriu Portugés  servisu hamutuk hodi buka solusaun ba problema refere, no mós aproximasaun ho madre sira Leiria Fátima, Embaixadora sira haree hela urjentemente problema ida-ne’e no sei utiliza kanál sira hotu atu bele rezolve lalais.  Mekanizmu ida mak sei konvoka reuniaun para bele husu rekonsiliasaun ka perdaun entre membru sira,”  haktuir iha komunikadu imprensa.

Oras ne’e dadauk, Embaixada Timor-Leste nian iha Lisbo- Portugál hamutuk ho Polísia Judisiária no mós Madre sira iha Leiria Fátima buka hela solusaun bá problema refere, nune’e bele halo rekonsiliasaun entre grupu rival  joven timoroan sira ne’e.

Governu mós sei bolu ajénsia sira-ne’ebé mak fasilita joven sira bá Portugál ne’e atu iha responsábilidade bá sira, nune’e antes haruka bá, tenki sira kumpre ba lei no regulamentu husi nasaun ne’e nian.

Jornalista: Rogério Pereira Cárceres