Hatutan.com, (22 Maiu 2024), Díli- Prezidente Repúblika (PR), José Ramos-Horta ezije rezultadu  investigasaun bá pesoál membru Polícia Ciêntífica e de Investigação Criminal (PCIC) ne’ebé husu osan bá  oan mane fujitivu Arnolfo Teves Jr.

Lee Mós: MJ Sérgio Hornai Sei Foti Medida Hasoru Pesoál PCIC Husu Osan bá Oan-Mane Fujitivu Teves Jr

Prezidente Repúblika, José Ramos-Horta. Foto/Elio dos Santos

Prezidente Repúblika konsidera hahalok ne’ebé komete husi pesoál membru PCIC hodi husu osan fá fujitivu Arnolfo Teves Jr nia oan ne’e viola prinsípiu no regra disiplinár Polísia nian no halo Timor-Leste nia naran monu no kredibilidade PCIC mós monu.

Xefe Estadu  espera  prosesu investigasaun kona-bá  pesoál membru PCIC ne’e kompleta ona tanba halo Timor-Leste nia naran aat, halo PCIC nia naran aat, Timor-Leste atu tama ASEAN, kooperasaun iha setór hotu-hotu inklui iha seguransa bá anti terorismu, Money Laundry, no afinal iha elementu PCIC halo fali nune’e.

“Ha’u hein de’it prosesu investigasaun tanba dala barak investigasaun sira nune’e ita nunka hatene rezultadu, no dala barak ona hatete investigasaun mas  ha’u la haree rezultadu. Ha’u hein rezultadu agora no sei la hein kleur tan,” Prezidente Repúblika, José Ramos-Horta hateten bá jornalista iha Palasiu Prezidensiál, Kuarta (22/05/2024).

Xefe Estadu afirma ema ki’ik no ki’ak  sira halo nune’e kaer kedas, lori kedas bá kadeia, no agora buat ida violasaun grave hasoru regra no disiplina Polísia nian ne’ebé halo Timor-Leste nia naran monu iha tahu laran, investigasaun la remata de’it, tanba ne’e nia ezije rezultadu.

Iha loron Tersa 09 fulan-Abríl 2024 liubá, PCIC liu husi ekipa investigadór sira hahú loke prosesu averiguasaun hasoru membru PCIC ho inisiál OdCA ne’ebé deskonfia husu osan bá fujitivu Arnolfo Teves Jr nia oan-mane liuhosi gravasaun audio iha média sosiál WhatsApp foin lalais ne’e.

Portavós PCIC, Mário Tavares dehan, hanesan saida mak espalla ona iha média sosiál, prosesu internu bá iha membru ne’e la’o ona iha prosesu averiguasaun nia laran no tuir dokumentu ne’ebé nia asesu katak, averiguasaun ida-ne’e la’o durante loron sanulu hodi halo konkluzaun.

“Medida ne’ebé mak foti ona maka loke ona prosesu averiguasaun hasoru pesoál ne’e. Tuir dokumentu ha’u asesu prosesu ne’e la’o iha prazu loron 10 nia laran, atu haree pena saida, konkluzaun saida mak atu halo bá nia. Rekolla provas hotu, indísiu hotu nune’e ita haree katak, sim, kulpadu, iha duni prosesu nia laran,” portavós PCIC, Mario Tavares hatán bá Hatutan.com, Tersa (09/04/2024).

Antes ne’e mos, Ministru Justisa (MJ), Sérgio de Jesus Fernandes da Costa Hornai,  afirma   foti medida forte to’o bele halo demisaun bá pesoál membru PCIC ida ne’ebé deskonfia husu osan bá fujitivu Arnolfo Teves Jr nia oan-mane.

Jornalista: Vito Salvadór