Hatutan.com, (21 Maiu 2024), Díli-Polísia Nasionál Timor-Leste (PNTL) Munisípiu Díli kaptura no detein autór ida ho inisial MdS tanba harahun kadeira tuur-fatin hamutuk 14 ne’ebé baibain adeptu sira tuur durante asiste Kampionatu Nasionál Boxe iha salaun Jinájiu Munisipál Díli (GMT-sigla Indonézia).

Polísia detein autór ida ne’ebé sobu kadeira iha GMT laran, Segunda kalan (20/05/2024). Foto/Tome da Silva

Komandante PNTL Munisípiu Dili, Superintendente Xefe Polísia Orlando Gomes, informa katak, insidente ne’e mosu iha Segunda  kalan (20/05/2024),  tanba suspeitu MdS la satisfás ho desizaun juri nian ne’ebé deskonfia la-hatudu transparánsia iha prosesu foti desizaun.

“Horikalan, iha duni kazu dano agravado, ne’ebé mak mosu iha GMT, tanba iha atividades kompetisaun Boxing iha GMT ne’ebé maka iha maizumenus tuku 00:00 kalan-boot, iha ita-nia sidadaun balu ne’ebé mak la satisfás ho desizaun juri ninian, entaun nia estraga ka halo rahun tiha kadeira adeptu sira baibain hodi tuur iha GMT laran kuaje unidade 14,” Komandante Orlando Gomes, informa bá jornalista sira iha kna’ar fatin, Caicoli-Dili, Tersa (21/05/2024).

Iha akontesimentu ne’e, membru sira hosi Unidade Espesial Polísia (UEP) liuhosi Batallaun Ordém Públiku (BOP) halo kedas kapturasaun bá suspeitu iha lokál insidente hodi entrega bá iha ekipa patrulla Vera Cruz, hodi hala’o prosesu investigasaun.

Kadeira GMT nian ne’ebé autór sobu. Foto/Tome da Silva

“Agora dadauk suspeitu ne’e iha hela detesaun  tanba nia kontra artigu 259 lei kógidu penal Timor-Leste kona-bá dano agravado no agora dadauk  submete ona bá iha oras  72 hodi aprezenta bá iha Ministériu Públiku,” Orlando Gomes informa.

Kampionatu Nasionál Boxe ne’e rasik apoiu orsamentu hosi Ministeriu Juventude Desportu Arte no Kultura, no partisipa hosi klube boxing hamutuk 23, asososiasaun boxing mai hosi Munisípiu Emera, Baucau, Ainaro Manufahi, Manatuto, Lautem no Rejiaun Administrativa Esepsiál Oé-Cusse Ambeno (RAEOA).

Jornalista: Rogério Pereira Cárceres