Hatutan.com, (13 Maiu 2024), Díli—Prezidente Repúblika (PR), José Ramos-Horta promulga ona proposta Lei, 2ª alterasaun bá Lei n°8/2009, 15 de Jullu kona-bá Komisaun Anti-Korrupsaun (CAC siglá portugés), atu fasilita Parlamentu Nasionál (PN) halo eleisaun bá Komissáriu foun.

José Ramos-Horta hateten, alterasaun bá Lei CAC ne’ebé nia simu hosi Parlamentu Nasionál promulga ona iha Sesta (10/05/2024).

Lee Mós: Prezidente Repúblika Konkorda no Sei Promulga Alterasaun Lei CAC

Ho alterasaun ne’e, Xefe Estadu hatutan, iha Parlamentu Nasionál ho maioria simples de’it bele ona halo eleisaun hodi hili Komissáriu CAC foun, hodi bele ezerse funsaun bá Kombate Korupsaun iha Timor-Leste.

“Ho alterasaun ne’e haree katak di’ak liu. Fásil liu, tanba ita iha rai ida ne’ebé demokrasia sei frázil, politizadu barak no ne’e la’ós ida de’it mak halo. Hotu-hotu halo no iha demokrasia nune’e duni. Entaun buka sistema ne’ebé fásil tanba ne’e mak Governu halo emenda ho alterasaun sira ne’e atu eleisaun bá Komissáriu CAC ne’e liu hosi maioria simples de’it,” José Ramos-Horta iha Palásiu Prezidensiál Nicolau Lobato Bairru Pité, segunda (13/05/2024).

Xefe Estadu hatutan, ho alterasaun Lei CAC ne’e nia parte konkorda atu iha de’it maioria simples natón ona atu hili Komisáriu foun.

Iha loron 22 fulan-Abríl 2024, Parlamentu Nasionál aprova proposta Lei, 2ª alterasaun bá Lei n°8/2009, 15 de jullu kona-bá Komisaun Anti-Korrupsaun (CAC siglá portugés) iha finál globál hodi haruka bá Prezidente Repúblika no ikus-mai hetan promulgasaun.

Jornalista: Vito Salvadór