Hatutan.com, (06 Abríl 2024), Díli—Asosiasaun Halibur Defisiênsia Matan Timor-Leste (AHDM-TL), kondena aktu brutalizmu hosi membru Servisu Nasionál Intelijénsia (SNI) hasoru ema ho defisiénsia ne’ebé akontese iha Postu-Administrativu Tilomar, Munisípiu Covalima.

Logo AHDM-TL

Porta voz AHDM-TL, Carceres Nunes Arca Tura hateten, iha loron 01 fulan-maiu 2024 membru SNI tiru joven ida hosi kotuk borus to’o kalilin, no baku tán joven na’in-rua, inklui maluk defisiénsia matan na’in ida iha-suku Beiseuk, Postu administrativu Tilomar, Munisipiu Covalima.

Lee Mós: Estadu Presiza Aselera Ratifikasaun Konvensaun Internasionál Direitu Bá Ema ho Defisiénsia

Tuir relatóriu hosi fatin akontensimentu, SNI ne’e baku ema ho defisiensia matan to’o liman tohar ho kondisaun grave iha parte liman-loos nian.

Tanba ne’e, AHDM-TL liu hosi komunikadu imprensa ida-ne’e hato’o lamentasaun no kondena tebes aktu brutalizmu hirak ne’e.

AHDM-TL konsidera Timor-Leste (TL) nu’udár Estadu direitu demokrátiku, iha ne’ebé Supremasia Konstituisaun, ema hotu hanesan iha Lei nia oin no respeitu bá direitus humanus, nu’udár prinsípiu báziku sira iha Estadu direitu demokrátiku.

“Hun bá prinsipiu Estadu direitu maka ami hosi Asosiasaun Halibur Defisiénsia Matan Timor-Leste, kondena aktu ne’ebé komete hosi membru Servisu Nasionál Intelijénsia nu’udár aktu ne’ebé viola prinsipiu hirak ne’e, liuliu violasaun bá direitus humanus, espesialmente viola direitu ema ho difisiénsia nian,” Carceres Nunes Arca Tura hateten iha sede AHDM-TL, Manleuana, Segunda (06/05/2024).

AHDM-TL mós hakarak ejize bá Komandu Jerál Polísia Nasionál Timor Leste (PNTL), Diresaun Servisu Nasional Intelijénsia atu toma responsabilidade bá aktu ne’ebé komete hosi membru SNI no prossesa ho transparente no rigór tuir regulamentu hotu mak vigora iha Estadu ida-ne’e. Se Justu liu demite hosi nia kargu.

AHDM-TL mós husu bá Provedoria Direitos Humanos e Justiça (PDHJ) atu tulun vititima sira hodi Prossesa no akompaña prossesu investigasaun sira atu bele la’o ho transparente to’o hetan justisa loloos.

Ministériu Defeza no Seguransa hamutuk ho PNTL no F-FDTL koopera ho PDHJ atu integra matéria sira kona-bá direitus humanus, liuliu direitu ema ho Defisiénsia nian iha formasaun akademia PNTL no F-FDTL nian, atu iha futuru asaun saida de’it mak membru seguransa sira hala’o iha terrenu bele respeita povu kbi’it-laek-nia direitu, liuliu direitu ema ho defisiénsia nian.

“Instituisaun PNTL no F-FDTL nu’udár protetór Lei no órden, hanesan liman kroat povu nian atu hatudu profisionalizmu iha atuasaun saida de’it iha ambiente Estadu Direitu demokratiku no tau aas no respeita prinsipiu sira direitus humanus nian,” nia subliña.

AHDM-TL husu atu sosiedade hotu respeita ema ho defisiénsia sira-nia direitu iha asaun prátiku saida de’it, nune’e ema hotu-hotu bele goza direitu no liberdade iha ambiente Estadu direitu demokrátiku.

Jornalista: Vito Salvadór