Hatutan.com, (24 Abríl 2024), Díli—Espasu sira ne’ebé daudaun ne’e Sekretária Estadu asuntu Toponímia no Organizasaun Urbana ( SEATOU) sobu iha sidade Díli laran sei transforma bá jardín.

Lee Mós: Governu Notifika De’it Uma-Kain 6 Atu Hamamuk, Maibé iha Eviksaun Halo bá Uma-Kain 40

Ministru Obras Públiku (MOP), Samuel Marçal. Foto/Tome da Silva

Ministru Obras Públiku (MOP), Samuel Marçal, hateten uma lubuk ida ne’ebé hetan eviksaun tana harii iha espasu publika no rai Estadu nian, hanesan iha antigu pasar Sengol  Bidau nian tesik to’o Bidau Santa-Ana nian sei transforma bá jardín   

“Polítika agora Governu nian bá espasu sira mamuk ona ne’e harii trotoar no hadi’a estrada, hadi’a sistema drenajen, hadia instalasaun bee-moos, eletrisidade no harii jardín ho monta Wi-fi internet atu bele fasilita joven no estudante sira, halibur malu, tuur hakmatek no atividade seluk ne’ebé konstrui bá muda mentalidade,” Ministru Samuel Marçal informa hodi responde  Hatutan.com iha Palásiu Governu, Kuarta (24/04/2024).  

Liga ho indenizasaun bá komunidade sira ne’ebé afetadu, Samuel Marçal esplika daudaun ne’e iha hela prosesu, balun hatama ona dokumentu, balun sidauk, nune’e sei halo identifikasaun bá dokumentu hirak ne’e antes pagamentu tanba sei bazeia bá situasaun fatin ne’ebé sira hela tuir rezultadu identifikasaun.

“Kona-bá pagamentu sei halo  bainhira sira kompleta ona dokumentu. Komunidade sira iha área Aitarak-Laran asina hotu ona, hein de’it manda konta bankária bele halo ona transferénsia osan ba sira ida-idak nia konta,” Samuel Marçal hateten.

Uma-kain 26 ne’ebé afetadu hosi evokasaun ne’e, tuir dadus MOP nian katak, uma ka’in-25 mak asina hotu ona kontratu atu halo pagamentu. Nune’e, hela de’it uma-kain ida (1) sei iha negosiasaun tanba razaun osan ne’ebé Estadu atribui  la refleta ho nia kondisaun uma.

Sei Laiha Manipulasaun

Liga ho projetu estrada emerjénsia ne’ebé  daudaun ne’e kompañia hirak hahú ona servisu, maske iha preokupasaun tanba la obedese bá prinsípiu transparénsia no posivel bele hamosu inventa folin ka mark up folin, Ministru Samuel Marçal hateten tanba projetu ne’e ho kategoria emerjénsia, nune’e teknikamente laiha problema ho ida-ne’e.

“MOP garante sei la akontese manipulasaun bá presu projetu emerjénsia sira ne’e,” Samuel Marçal hateten.

Jornalista: Leopoldina de Carvalho